……………………………………………………………………………………………………………
Komunikadu Imprensa
Sorumutuk Estraordináriu Konsellu Ministrus nian loron 27 fulan-fevereiru tinan 2020
Konsellu Ministrus hala’o sorumutuk iha Palásiu Governu, iha Dili no aprova ona projetu Rezolusaun Governu nian, ne’ebé Ministra Finansas Interina, Sara Lobo Brites, aprezenta, kona-ba Rejime Tarifáriu ne’ebé iha Relasaun ho Utilizasaun Portu Tibar no Servisu sira ne’ebé iha Ligasaun. Governu, ho forma ida-ne’e, halo aprovasaun ba lista kona-ba tarifa suplementár no montante hirak ne’ebé Estadu no konsesionáriu konkorda ona, ba publikasaun tuirmai iha Jornál da Repúblika, kona-ba lista integrál husi tarifa prinsipál no suplementár sira, atubele halo kobransa tarifa hirak ne’e hahú husi períodu operasaun Portu Tibar nian.
Ministra Finansas Interina ne’e aprezenta ona projetu deliberasaun ida, ne’ebé hetan ona aprovasaun husi Konsellu Ministrus, kona-ba utilizasaun empréstimu konsesionál IDA 18, husi Banku Mundiál, ne’ebé atu utiliza iha projetu bee no saneamentu nian iha Munisípiu Baukau no iha fortalesimentu ensinu báziku iha Timor-Leste. REMATA