Governu sei submete proposta OJE foun ba 2020 no kria Ekipa traballu Revizaun

Kua. 04 dezembru 2019, 11:53h

Haree ba nesesidade prinsipál husi Orsamentu Jerál Estadu (OJE) nian ba nasaun no preokupasaun husi deputadu sira Parlamentu Nasionál nian, hanesan hakerek iha relatóriu sira ne’ebé aprezenta ona, Governu deside dada  fali proposta OJE nian no entrega fali versaun foun husi proposta OJE nian ba tinan 2020.

Proposta ne’e sei hetan revizaun no versaun foun husi proposta ne’e sei haruka ba Parlamentu Nasionál iha loron 13 fulan-dezembru oinmai. Desizaun ne’e fó-sai hafoin loron daruak diskusaun iha jeneralidade.

Primeiru-Ministru, Taur Matan Ruak, promete “ajusta testu ne’e hodi fó konsiderasaun mós ba preokupasaun husi distintu deputadu sira no aprezenta fali proposta foun ba diskusaun”. Taur Matan Ruak agradese “ba pasiénsia no dedikasaun husi deputadu hotu-hotu ba tulun no kontributu ne’ebé sira fó ona ba aprovasaun OJE ba tinan 2020”.

Membru Governu sira hala’o sorumutuk iha dadeer loron 4 fulan-dezembru nian, iha Palásiu Governu, hodi artikula proposta foun OJE nian ne’ebé sei haruka ba Parlamentu Nasionál.

Ba ida-ne’e, kria ona ekipa serbisu ida ba revizaun proposta OJE nian, ne’ebé lidera hosi Ministru Estadu Prezidénsia Konsellu Ministrus, Agio Pereira. Ekipa ne’e sei hahú serbisu hotu-hotu ne’ebé nesesáriu ba preparasun proposta foun ne’e, hodi konsidera rekomendasaun sira Parlamentu Nasionál nian.

 

 

   Ba leten