Governo no Parlamento Nasional Hahu Debate Orsamentu Jeral Estado Tinan 2020

Seg. 02 dezembru 2019, 14:56h
IMG_0845

Diskusaun kona-ba Proposta Lei Orsamentu Jerál Estadu (OJE) ba tinan fiskál 2020 hahú iha segunda, loron 2 fulan-dezembru tinan 2019, ho partisipasaun husi Primeiru-Ministru Taur Matan Ruak no Membru VIII Governu Konstitusionál. OJE ne’e prepara bazeia ba prinsípiu fundamentál lima, maka hanesan sustentabilidade fiskál iha prazu médiu no prazu naruk, aliñamentu ho prioridade nasionál sira, kapasidade ezekusaun orsamentál, kapasidade ekonomia lokál atu absorve orsamentu ne’e no kualidade orsamentu nian. Ba ida-ne’e, Governu submete ba Parlamentu Nasionál atubele diskute no aprova, Orsamentu Jerál Estadu nian ba tinan 2020 ho despeza públika ida ho valór dolar amerikanu millaun 1.950 (millaun rihun ida atus sia limanulu).

Área tolu atuasaun prioritária nian, ne’ebé Konsellu Ministrus aprova ona maka dezenvolvimentu kapitál sosiál, ne’ebé foka liu ba edukasaun no formasaun, saúde no fornesimentu bee moos, no infraestrutura saneamentu báziku; dezenvolvimentu ekonómiku ne’ebé haree liu ba insentivu ba investimentu setór privadu nian, kriasaun empregu, diversifikasaun ekonómika no dezenvolvimentu setór agrikultura; no aumentu konetividade nasionál ho dezenvolvimentu portu, aeroportu, estrada rurál no urbana sira no dezenvolvimentu lojístika nasionál, ho kriasaun infraestrutura ba prosesamentu no armazenamentu no ho melloria transporte tasik, rai-maran no aéreu.

Iha ninia intervensaun, Primeiru-Ministru hateten katak “Orsamentu Jerál Estadu nian hanesan instrumentu prinsipál ba implementasaun medida no polítika públika nian ne’ebé sei sai matadalan ba governasaun ne’e iha tinan oinmai, no ne’ebé hakarak fó kontinuidade ba prosesu harii País ho Rendimentu Médiu-Aas ida, tuir Planu Estratéjiku Dezenvolvimentu tinan 2011-2030. Ha’u hein katak Parlamentár sira-hotu sei kontribui ho hanoin konstrutivu ba prosesu orsamentál ne’e, ne’ebé sei konta duni ho prezensa, partisipasaun no kontribuisaun ativa husi membru Governu sira”.

Debate OJE tinan 2020 ne’e sei kontinua ho diskusaun no votasaun iha jeneralidade iha loron 2, 3 no 4 fulan-dezembru tinan 2019. Diskusaun iha espesialidade no votasaun finál globál sei hala’o to’o loron 18. Redasaun finál ne’e sei haruka ba Prezidente Repúblika iha loron 19 fulan-dezembru tinan 2019.

   Ba leten