Timor-Leste partisipa iha sorumutuk ba preparasaun Expo 2020 Dubai

Dom. 01 dezembru 2019, 09:22h
expo2020-ipm-3-3200-x-1800

Delegasaun ida husi Timor-Leste partisipa ona, iha loron 29 no 30 fulan-novembru, iha Sorumutuk Internasionál Partisipante sira nian (International Participants Meeting, IPM) iha Expo tinan 2020, iha Dubai.

IPM dahaat ne’e konta ho prezensa husi delegasaun timoroan, ne’ebé lidera husi Autoridade Nasionál ba Expo tinan 2020 Dubai, Francisco Kalbualdi Lay. Eventu ne’e, konta mós ho prezensa husi partisipante maizumenus rihun ida husi mundu tomak, entre membru no funsionáriu governamentál sira, delegadu no parseiru komersiál sira husi país maizumenus 200, no organizasaun partisipante sira, aleinde reprezentante sira husi Gabinete Internasionál Espozisaun (Bureau International des Expositions, BIE) no membru sira husi Komité Superiór Expo tinan 2020 Dubai nian.

Iha eventu loron rua nia laran ne’e, partisipante sira hetan asesu ba informasaun kona-ba progresu sira iha konstrusaun espozisaun mundiál ne’e nian no kona-ba kalendáriu no prazu entrega nian, rekizitu no norma sira ne’ebé atu kumpre, programasaun, design, marketing, komunikasaun no lojístika. Sira mós iha oportunidade hodi hala’o sorumutuk téknika ho responsavel jerál Expo tinan 2020 nian sira ba nasaun ida-idak ho objetivu atu aprofunda temátika sira ne’ebé aborda no atu esklarese dúvida téknika ba preparasaun espozisaun no programa país ida-idak nian.

Expo Dubai 2020 sei hala’o iha Dubai, Emiradus Árabes Unidus, husi loron 20 fulan-outubru tinan 2020 to’o loron 10 fulan-abríl tinan 2021 no sai hanesan Espozisaun Mundiál dahuluk ne’ebé sei hala’o iha Médiu Oriente. Ho lema “Tau neon hamutuk, hodi harii futuru” no ho subtema “Mobilidade”, “Sustentabilidade” no “Oportunidade”, Expo ne’e sei konta ho partisipasaun husi nasaun 192 no vizitante millaun 25, ne’ebé 70% mak estranjeiru.

Timor-Leste sei partisipa iha área temátika “Oportunidade”, ho tema “Timor-Leste, Explore the undiscovered”, iha eventu ida ho projesaun internasionál boot, ne’ebé sei permite Timor-Leste hodi promove ninia kultura, paizajen, rikeza naturál sira, produtu sira, no artezanatu, ba ema tokon ba tokon, hodi atrai potensiál investidór no vizitante sira.

Ministra Estadu ba Kooperasaun Internasionál Emiradus Árabes Unidus nian no Diretora Jerál Expo 2020, Reem Al Hashimy, hateten katak “iha tinan oin, Dubai no Emiradus Árabes Unidus sei halibur mundu ba Expo Mundiál ida ne’ebé promove kolaborasaun no hein katak bele kria diálogu globál nakloke ida ne’ebé sei permite ita atu haree ba futuru ho otimizmu renovadu.

Reem Al Hashimy hatutan katak “nasaun partisipante 192 ida-idak iha sira-nia persesaun, esperiénsia no hanoin inovadór sira ne’ebé iha papél ida atu dezempeña hodi harii futuru ida ne’ebé di’ak liu. Halibur reprezentante to’o rihun iha ne’e, iha Dubai, ba Sorumutuk Internasionál Partisipante sira nian ne’e reflete kompromisu ba kolaborasaun, ba diálogu nakloke no ba otimizmu ne’ebé Expo Dubai tinan 2020 inkorpora.”

Vicente Loscertales, Sekretáriu-Jerál BIE, órgaun governamentál husi Espozisaun Mundiál sira nian, hateten: “Ambisaun husi Expo Dubai tinan 2020 nian atu halibur nasaun hotu-hotu iha mundu atu selebra hamutuk progresu umanu ne’e notavel. Sorumutuk loron rua nian ne’e sei lori ita liuhusi aspetu finál balun kona-ba preparasaun no implementasaun atu entrega eventu transformadór ida-ne’e.

“Bainhira tempu la to’o tan ona tinan ida molok abertura Expo tinan 2020, ba selebrasaun ida durante fulan neen nian ne’ebé halibur nasaun sira, sei hatudu solusaun, troka ideia no promove deskoberta kulturál sira, IPM ida-ne’e signifikativu tebetebes. Ami hakarak atu rona lalais ona kontribuisaun sira ne’ebé Expo 2020 Dubai no Partisipante Internasionál sira husi planeta tomak sei halo ba oportunidade globál ida-ne’e, ne’ebé buka atu ajuda forma ita-nia futuru hamutuk”, Vicente Loscertales hatutan.

   Ba leten