Tomada Pose ba Prezidente foun RAEOA nian

Kua. 13 novembru 2019, 16:08h
74892995_1921987807948084_1266671617497366528_n

Eis-Vise-Primeiru-Ministru, José Luís Guterres, simu ona pose nu’udar Prezidente Rejiaun Administrativa Espesiál Oekusi Ambenu (RAEOA), husi Primeiru-Ministru, Taur Matan Ruak, iha serimónia ida-ne’ebé hala’o iha loron 13 fulan-novembru tinan 2019, iha Palásiu Governu, iha Dili.

RAEOA ne’e harii iha tinan 2014 ho objetivu atu favorese dezenvolvimentu inkluzivu Rejiaun ne’e nian, no fó liu prioridade ba atividade sira ho karakter Sosioekonómiku hodi promove kualidade moris no moris-di’ak komunidade nian.

Proposta Rezolusaun Governu nian kona-ba nomeasaun José Luís Guterres hetan tiha ona aprovasaun iha sorumutuk Konsellu Ministrus nian, iha loron 6 fulan-novembru, “hodi rekoñese méritu no idoneidade ne’ebé sosiedade Timor-Leste nian rekoñese publikamente no esperiénsia iha dezempeñu ba kargu públiku sira ho natureza ezekutiva”.

Nune’e, Eis-Vise-Primeiru-Ministru ne’e, substitui Arsénio Bano ne’ebé mak asume funsaun hafoin eis-Prezidente RAEOA, Mari Alkatiri, remata ninia mandatu iha fulan-jullu tinan ida-ne’e.

Iha ninia intervensaun hafoin asinatura ba termu pose, José Luís Guterres hateten katak “importante ba nasaun no ba povu Oekusi atu kontinua ho dezenvolvimentu ne’ebé maka hahú tiha ona no importante liután maka hasa’e rendimentu família rurál sira-nian ne’ebé hela iha territóriu Oekusi, rezolve kestaun bázika iha ita-nia populasaun nia moris, hanesan bee, saneamentu, hela-fatin, saúde no rede eskolár”.

Prezidente foun RAEOA nian ne’e mós hateten klaru katak nia sei fó “atensaun maka’as liu ba produsaun agropekuária no peska, ba dezenvolvimentu indústria no ba kriasaun kondisaun sira ba turizmu atu nune’e povu bele hetan benefísiu kedas”. Na’i ulun ne’e hatutan tan katak nia sei serbisu “ho Governu Sentrál atu dada investidór nasionál no internasionál sira ba Oekusi atubele kria empregu no rendimentu ba populasaun”.

Primeiru-Ministru, Taur Matan Ruak, “lori nia naran no Governu Konstitusionál VIII nia naran, agradese ba disponibilidade Prezidente foun nian atu asume misaun ne’e no ba Prezidente interinu, Arsénio Bano, ba ninia disponibilidade hodi lidera durante períodu tranzisaun” no hateten katak nia hein atu “Prezidente foun RAEOA nian kontinua ho serbisu hirak ne’ebé molok ne’e hala’o tiha ona, atu hadi’a saida maka halo ona no muda saida maka seidauk di’ak”, nune’e “bele hatán ba populasaun Oekusi ninia aspirasaun no nesesidade sira”, hodi kumpre “ mehi katak ema hotu-hotu iha Oekusi bele hetan benefísiu husi dezenvolvimentu”.

Taur Matan Ruak dehan tan katak “Governu Sentrál prontu atu apoia Prezidente foun molok no hafoin faze tranzisaun ida-ne’e” atu nune’e atividade iha Oekusi labele para, maibé la haluha mós Ataúru” ne’ebé halo parte mós ba Zona Espesiál Ekonomia Sosiál Merkadu Timor-Leste (ZEESM).

   Ba leten