Governu Timor-Leste

Governu entrega ona, horiseik, loron 15 fulan-outubru tinan 2019, Proposta Lei Orsamentu Jerál Estadu (OJE) tinan 2020 nian ba Prezidente Parlamentu Nasionál, Arão Noé Amaral. Orsamentu ne’ebé entrega iha Parlamentu ne’e inklui reseita no despeza hotu-hotu Estadu nian no Seguransa Sosiál Timor-Leste nian no kobre períodu husi loron 1 fulan-janeiru to’o loron 31 fulan-dezembru tinan 2020.

Proposta Lei Orsamentu Jerál Estadu nian ba tinan 2020 ne’e hetan ona aprovasaun iha Konsellu Ministrus iha loron 2 fulan-outubru liubá. Ministru Reforma Lejizlativa no Asuntus Parlamentares, Fidelis Leite Magalhães, no Vise-Ministra Finansas, Sara Lobo Brites, mak entrega ona Proposta ne’e ba Prezidente Parlamentu Nasionál.

Proposta Lei ne’e prevee montante totál ida ho dolar amerikanu millaun rihun 1,95, atu kobre nesesidade husi programa no prioridade nasionál sira ne’ebé Governu Konstitusionál VIII define ona. Husi valór ne’e, millaun 241,271 aloka ba saláriu no vensimentu sira, millaun 738,428 aloka ba beins no servisus, millaun 457,773 aloka ba transferénsia públika sira, millaun 53,267 aloka ba capital menór no ikusliu millaun 459,260 aloka ba capital dezenvolvimentu.

Prezidente Parlamentu Nasionál sei hatún proposta OJE ne’e ba Komisaun C, atubele hahú prosesu diskusaun, molok aprezentasaun iha Plenáriu, iha fulan-dezembru oinmai.