Governu Timor-Leste

Iha loron 4 fulan-Outubru tinan 2019, hahu husi oras 15h45 to’o 17h, sei hala’o Projetu Portu Baia Tibar (Tibar Bay Port Project, TBPP), serimónia sensibilizasaun ba prevensaun kankru susun. Eventu ida ne’e rezulta parseria entre Projetu Portu Baia Tibar no Fundasaun Alola no tama iha asaun sensibilizasaun no prevensaun ba kankru susun ne’ebé sei hala’o iha mundu tomak iha fulan-outubru, fulan internasionál ba Prevensaun Kankru Susun. Eventu ida ne’e sei hetan partisipasaun husi Membru VIII Governu Konstitusionál, no sei iha intervensaun husi parte reprezentante TBPP, diretora Fundasaun Alola no husi eis-Prezidente Repúblika Kay Rala Xanana Gusmão. Durante serimónia ne’e sei rekolla donativu ba programa HALIKU (Hau Hili Atu Kura, Eu Escolho Curar-me), husi fundasaun Alola, hanesan programa sensibilizasaun no apoiu ba feto ho kankru iha Timor-Leste, ne’ebé estabelese iha tinan 2014 husi Kirsty Sword Gusmão, fundadora Fundasaun Alola no sobrevivente kankru susun. Programa ida ne’e nia objetivu atu aumenta koñesimentu ba feto atu halo prevensaun, detekta sedu no halo tratamentu ba kankru.