Sorumutuk Estraordinária Konsellu Ministrus nian iha loron 27 fulan-setembru tinan 2019

Prezidénsia Konsellu Ministrus

VIII Governu Konstitusionál

……………………………………………………………………………………………………………

Komunikadu Imprensa

Sorumutuk Estraordinária Konsellu Ministrus nian iha loron 27 fulan-setembru tinan 2019

Konsellu Ministrus hala’o sorumutuk iha Palásiu Governu, iha Dili no aprova ona Dekretu Governu, ne’ebé aprezenta husi Ministru Petróleu no Minerais iha ezersísiu, Agio Pereira no husi Autoridade Nasionál Petróleu no Minerias Timor-Leste nian (ANPM), ne’ebé regulamenta prosedimentu kona-ba afetasaun área sira iha territóriu Timor-Leste nian ba atividade sira peskiza no produsaun petrolífera nian.

Ho objetivu ba realizasaun atividade sira peskiza no produsaun petrolífera nian, iha biban ida ne’e,  kontinua halo mós análize ba Rezolusaun Governu nian kona-ba autorizasaun atu loke konkursu públiku sira ba selebrasaun kontratu petrolíferu, tuir Lei Atividade Petrolífera nian.

Ministru Agrikultura no Peskas iha ezersísiu, Fidelis Leite Magalhães, halo aprezentasaun ida ba Konsellu Ministrus kona-ba moras ne’ebé provoka fahi atus ba atus mate iha territóriu nasionál. Halo ona amostra ba animál sira ne’e no haruka ona ba análiza laboratoriál iha Austrália ne’ebé konfirma katak animál sira ne’e hetan moras fahi nian husi áfrika (african swine fever). Moras ida ne’e da’et lalais tebes  husi animál ida ba fali animál seluk, maibé la prodús efeitu ba ema no afeta ona iha nasaun aziátiku barak. Ministru Agrikultura no Peskas, iha kolaborasaun ho Governu Austrália nian, hala’o ona medidas nesesárias hotu-hotu hodi limita efeitu husi moras ne’e, ne’ebé mak seidauk iha aimoruk, kura ka vasina. Remata

url: http://timor-leste.gov.tl?lang=tp&p=23034