Selebrasaun tinan da-70 Repúblika Populár Xina nian

Ministru Estadu Prezidénsia Konsellu Ministrus no Ministru Negósius Estranjeirus no Kooperasaun iha ezersísiu, Agio Pereira, iha loron 26 fulan-setembru partisipa iha serimónia komemorasaun aniversáriu Repúblika Populár Xina nian, ne’ebé mak iha loron 1 fulan-outubru mai kompleta tinan 70 husi kedas nia fundasaun.

Iha serimónia ida ne’ebé organiza husi Embaixada Repúblika Populár Xina nian iha Timor-Leste, membru Governu sira, Parlamentu Nasionál, Xefe Misaun nian sira iha Timor-Leste no membru Korpu Diplomátiku sira, halibur malu ho komunidade xineza nian iha Timor-Leste hodi selebra tinan 70 fundasaun país  ne’ebé mak ninia populasaun barak liu iha mundu.

Iha nia intervensaun, Ministru Estadu, hodi Governu nia naran, hato’o parabéns ba Repúblika Populár Xina nian ba nia aniversáriu no hahii ba “konkista no dezenvolvimentu boot hotu-hotu ne’ebé mak alkansa ona” husi nasaun ne’e.

Governante ne’e hanoin fali kona-ba “relasaun bilaterál ne’ebé di’ak tebtebes” entre nasaun rua ne’e, “ ho espíritu ida ne’ebé bazeia ba prinsípiu respeitu mútuu, igualdade no benefísiu mútuu nian”, no ko’alia liután ba “kooperasaun Xina nian iha setór edukasaun” ne’ebé mak bele “fó bolsa-de-estudu ba estudante timoroan sira hodi estuda iha universidade sira xina nian no interkámbiu akadémiku no sientífiku hotu” no kontribui “ba kualifikasaun téknika no sientífika ne’ebé boot, ba joven timoroan barak, hodi aselera dezenvolvimentu sosiál ekonómiku país nian”.

Agio Pereira, mós aproveita “hodi koa’lia liután ba kontributu husi empreza sira no sidadaun sira xineze nian ba dezenvolvimentu nasionál Timor-Leste nian” no afirma katak “ relasaun bilaterál entre Timor-Leste no Xina ne’e, forte tebes”, no hatutan tan katak “ iha poténsia atu aumenta tan kooperasaun ida ne’e iha área sira  hanesan investimentu, petróleu, agrikultura no peska”.

url: http://timor-leste.gov.tl?lang=tp&p=23022