Governu Timor-Leste

Primeiru-Ministru Taur Matan Ruak no Primeiru-Ministru Austrália, Scott Morrison, asina ona ohin, loron 30 fulan-agostu, tinan 2019, iha serimónia ida iha Palásiu Governu, Dili, Troka Nota Diplomátika sira kona-ba Tratadu ne’ebé estabelese Ketan Tasik sira iha Tasi Timor, ne’ebé nasaun rua ne’e asina tiha ona iha loron 6 fulan-marsu tinan 2018, iha Novaiorke.

Ho troka nota diplomátika sira ne’e, Tratadu Tasi Timor tama automatikamente iha vigór, no área konjunta esplorasaun petrolífera nian ida anteriór tama ba jurizdisaun Timor-Leste nian.

Nune’e, hakotu ona prosesu naruk ida-ne’e, ne’ebé hahú ho konsiliasaun obrigatória, iha fulan-abril tinan 2016, bazeia ba Konvensaun Nasoins Unidas nian kona-ba Direitu Tasi nian, no Timor-Leste sai nasaun dahuluk iha mundu ne’ebé utiliza mekanizmu ne’e, ne’ebé prevee iha Konvensaun ne’e.

Tratadu kona-ba Ketan Tasik, ne’ebé Timor-Leste no Austrália asina tiha ona iha loron 6 fulan-marsu tinan 2018, estabelese Ketan Tasik sira iha Tasi Timor, hodi asegura liña mediana ida iha Tasi Timor, ho de’it ajuste ki’ik ida atu hetan rezultadu ekuitativu ida, hanesan ida-ne’ebé direitu internasionál ezije.

Primeiru-Ministru Timor-Leste nian afirma, iha ninia diskursu, katak momentu ida-ne’e marka inísiu husi “hahú kapítulu foun ida kona-ba relasaun bilaterál sira entre ita-nia nasaun rua” no “hatudu ita-nia vontade mútua ne’ebé firme atu alkansa akordu ida ne’ebé justu no ekuitativu”.

Xefe Governu nasionál espresa ninia fiar “Austrália no Timor-Leste serbisu hamutuk nafatin, nune’e bele kumpre, ho dalan ne’ebé prátiku liu no dilijente liután, ita-nia povu rua ne’e ninia hakarak no aspirasaun loloos”.