Ministru Negósius Estranjeirus no Kooperasaun Organiza Enkontru Almosu Inter-Ministerial Kona-ba Adezaun ASEAN

Kua. 14 agostu 2019, 15:20h
AV3A0603

Timor-Leste nia Ministru Negósius Estranjeirus no Kooperasaun, S.E. Dionísio Babo Soares, organiza enkontru almosu inter-ministerial kona-ba adezaun ASEAN iha loron 13 Agostu 2019 iha Otél Timor Plaza.

Durante enkontru almosu ne’e, Ministru Babo Soares informa Ministru sira seluk kona-ba progresu iha prosesu adezaun ba ASEAN no preparasaun ba simu Misaun Téknika husi ASEAN hodi avalia Timor-Leste nia prontidaun, ne’ebé mak sei mai iha Dili iha inísiu fulan Setembru agora.

Membru Governu sira atende enkontru ne’e akompaña husi sira nia Diretór no Asesór tékniku sira ne’ebé mak halo servisu liga ho asuntu ASEAN.

Aleinde komitmentu husi polítiku nível-altu ba adezaun ASEAN, Timor-Leste mós implementa programa servisu tékniku ne’ebé kompriensivu hodi asegura nasaun nia prontidaun iha pilar tolu: Pilar Ekonomia, Pilar Polítika no Seguransa no Pilar Sósio-Kultural.

 Adezaun ba ASEAN sai hanesan prioridade nasionál no estratéjika ba Timor-Leste no nasaun ne’e iha esperansa katak adezaun ne’e sei la fó deit benefísiu ba Timor-Leste, maibé sei kontribui mós ba rejiaun ASEAN. Semana kotuk, Ministru Babo Soares atualiza Konsellu Ministru kona-ba planu servisu ba adezaun. Ministru informa fila fali katak 2019 sai hanesan tinan importante iha Timor-Leste nia preparasaun hodi sai membru ASEAN. REMATA

   Ba leten