Governu Timor-Leste

Delegasaun bo’ot husi Timor-Leste ne’ebé vizita Sekretariadu ASEAN, kompleta ho susesu enkontru intensivu lubuk ida kona-ba programa servisu kompriensivu ASEAN nian iha Jakarta, 22-24 Jullu 2019.

Enkontru durante loron tolu ne’e, kobre tópiku detallu sira kona-ba ASEAN nia enkuadramentu institusionál, estrutura, instrumentu legál no akordu sira iha pilar tolu: Komunidade Ekonómika ASEAN, Komunidade Polítika no Seguransa ASEAN no Komunidade Sósio-kulturál ASEAN. Timor-Leste nia delegasaun mos atualiza informasaun ba ofisiál sira iha ASEAN kona-ba servisu importante ne’ebé nasaun halo ona hodi prepara ba prosesu adezaun, inklui servisu ne’ebé foka liu ba iha Elementus Krítikus ba Adezaun nian.

Alende enkontru tékniku, Xefi Delegasaun, Embaixadór Jorge Trindade Neves Camões, mos halo vizita kortezia ida ba Vise Sekretáriu-Jeral ASEAN nian ba Asuntu Komunidade no Kooperativu, S.E. Dr. AKP Mochtan.

Ida ne’e mak ba dala uluk Timor-Leste haruka ekipa ne’ebé bo’ot hodi ba vizita Sekretariadu ASEAN no koalia kona-ba programa servisu ASEAN nian, hafoin nasaun espresa nia interese hodi sai membru ASEAN iha 2011. Delegasaun ne’ebé hamutuk ema nain rua nulu ne’e kompostu husi Diretór-Jerál no Pontu Fokal sira husi liñas-ministeriais ne’ebé mak halo servisu liga ho adezaun ba ASEAN, no lidera husi Ministériu Negósius Estranjeirus no Kooperasaun liu husi Diresaun-Jerál ba Asuntus ASEAN. Delegasaun ne’e agora dadauk fila fali ona mai Dili no sei fahe informasaun ba liña-ministeriál sira kona-ba rezultadu husi vizita ne’e.

Governu Timor-Leste mos sei kontinua hodi realiza nia servisu importante ba preparasaun tékniku, atu nune’e bele kumpri nasaun nia prioridade estratéjiku nasionál hodi adere ba ASEAN.

Timor-Leste nia delegasaun hato’o agradese wa’in ba Sekretariadu ASEAN no Membru Estadu ASEAN hotu, ba sira nia laran luak no ospitalidade hodi simu delegasaun ne’e no ba organiza programa ida ne’ebé kompriensivu tebes.