Governu Timor-Leste

Iha loron 11 fulan-juñu tinan 2019 halo ona lansamentu ofisiál ba programa HATUTAN (Hahán ne’ebé Atu fó Tulun ho Nutrisaun no Edukasaun – ai-han atu hadi’a nutrisaun no edukasaun), husi Ministra Edukasaun, Juventude no Desportu, Dulce de Jesus Soares, husi Ministru Agrikultura no Peskas, Joaquim José Gusmão dos Reis Martins no husi Vise-Ministra ba Kuidadu Saúde Primáriu sira, Élia António de Araújo dos Reis Amaral, ne’ebé akompaña husi Embaixadór Estadus Unidus Amérika nian, Kathleen Fitzpatrick. Serimónia ne’e hala’o iha sala sorumutuk Suai, iha Timor Plaza, iha Dili.

Programa HATUTAN ne’e ninia objetivu mak atu hadi’a edukasaun, nutrisaun no saúde iha eskola hamutuk 440 no komunidade sira ne’ebé besik eskola sira-ne’e iha munisípiu Ermera, Likisá, Ainaru no Manatutu, liuhusi apoiu ba agrikultór sira hodi hasa’e produsaun produtu lokál sira, atu ho forma ida-ne’e bele hasa’e rendimentu agrikultór sira nian no kria fonte sustentavel husi ai-han sira ne’ebé iha nutrisaun, ba eskola lokál sira. Programa ne’e mós sei tulun agrikultór sira hodi sosa ekipamentu agríkola esensiál sira no fornese asaun formasaun.

Programa HATUTAN ne’e nu’udar projetu ida ba tinan lima, ho valór osan besik dolar millaun 26, ho finansiamentu husi Departamentu Agrikultura Estadus Unidus Amérika nian, liuhusi Programa Internasionál Alimentasaun no Edukasaun Infantíl McGovern-Dole no sei implementa hosi Organizasaun Naun Govermentál (ONG) Care International liuhusi parseira ho Ministériu Edukasaun, Juventude no Desportu, Ministériu Saúde, Ministériu Agrikultura no Peskas no ONG Mercy Corps no Water Aid.

Ministra Edukasaun, Juventude no Desportu hateten katak “HATUTAN sei fó apoiu ba programa Governu nian sira kona-ba merenda eskolár, literasia no ensinu primáriu”.

Dulce de Jesus Soares, hateten katak programa ida-ne’e importante tanba bainhira serbisu hamutuk ho inan-aman no manorin na’in sira iha promosaun edukasaun ida-ne’ebé iha kualidade, sei tulun agrikultór sira hodi hasa’e sira-nia rendimentu no hatene kona-ba oinsá prepara ai-han saudavel no ne’ebé fó isin-di’ak (nutritiva) ba sira-nia oan sira.

Partisipa mós iha serimónia lansamentu ne’e reprezentante sira hosi Ministériu Finansas no Ministériu Negósius Estranjeirus no Kooperasaun, Prezidente Autoridade Munisípiu Ermera nian, dirijente sira husi Ministériu Edukasaun, Juventude no Desportu, Komisáriu Adjuntu hosi Komisaun Anti-Korrupsaun (KAK) no parseiru sira dezenvolvimentu nian.