Governu Atribui Sertifikadu Investidór no Deklarasaun Benefisiárius ba Kompañia Nain Hat

Ministru Estadu Prezidénsia Konsellu Ministrus no Ministru Koordenadór ba Asuntus Ekonómikus, iha ezersísiu, Agio Pereira no TradeInvest realiza iha loron 12 fulan-jullu tinan 2019, iha Palásiu Governu, iha Díli, hala’o serimónia atribuisaun sertifikadu Investidór no Deklarasaun Benefísiu ba empreza nain hat : Timor Port SA; Gota, Bebidas e Alimentos, Lda; Central Moris Unipessoal Lda. e Ami Hari Unipessoal Lda.

VIII Governu Konstitusionál reitera fila-fali ho forma kona-ba iha kompromissu bo’ot atu dezenvolve ekonomia nasionál ne’ebé sita ona iha Planu Dezenvolvimentu Estratéjiku Nasionál tinan 2011- 2030.

Durante serimónia Ministru Estadu iha nia intervensaun katak  “importante husi investidor sira iha medida ida ne’e hanesan parseira apoiu ba dezenvolvimento ekonomia iha nasaun ida ne’e”, akresenta mós “empreza sira okupa fatin ne’ebé espesial iha kuadru dezenvolvimentu nasionál ba Impelementasaun Planu Estratéjiku Nasionál Dezenvolvimentu nian”.

Ministru Estadu lamenta kona-ba “ difikuldade prosesuais ne’ebé sei iha ba emisaun Sertfikadu Investidór no Deklarasaun Benefísiu, hanesan difikuldade legais lejislasaun ne’ebé muda no difikuldade interpretasaun lei ne’e rasik, prinsipalmente iha investimentu ne’ebé bo’ot.

Agio Pereira akresenta mós “investidór sira hotu hetan respeita ho forma ne’ebé hanesan, tanba sira la’os investe deit iha nasaun, maibe kria mós kampu traballu no iha tempu ne’ebé hanesan mós apoiu iha projesaun imajen Estadu ba rai liur, no aumenta konfiansa ba investidór sira seluk hodi bele senti no motiva sira atu mai investe iha Timor-Leste”.

Ministru Estado, hodi naran VIII Governo Konstitusionál hato’o votus susesu ba kompañia nain hat ne’e no sei kontinua servisu hamutuk iha ida-ida nia area, hanesan parseiru Governu nian, hodi bele asegura ba susesu ba tempu naruk, no ba ita nia nasaun  no liuliu fó empregu ba sidadaun timoroan hotu”.

Durante serimónia ne’e, iha nia intervensaun Diretór Ezekutivu husi TradeInvest Timor-Leste no Prezidente Komisaun Avaliasaun Investimentu Privadu no Exportasaun, Arcanjo da Silva lamenta demora iha konfirmasaun no aprovasaun husi sertifikadu investidór no deklarasaun benefísiu.

Kompañia Timor Port, S.A hanesan empreza nasionál no sósiu direta ho Ballore Áfrika Logistik, S.A. ne’ebé atua iha area dezeñu, kontrusaun no operasoins portuaria no hala’o ona atividade iha konstrusaun Portu Tibar.

Gota Bebidas e Alimentos, Lda nu’udar kompañia lokal ne’ebé investe iha setór industria, produsaun be’e agua no hahu produs no distribui be’e agua ho medida agua fatin hanesan 600ml, 1500ml inklui gallon 19 litrus ba mrekadu nasionál hodi minimiza kuantidade be’e agua ne’ebé importa mai Timor-Leste.

Kompañia Ami Hari Unipessoal Lda hanesan empreza estranjeiru Austrália ne’ebé planu atu invetse iha setór indústria produsaun be’e agua ho medida 0.6ltr, 1.5ltr no 18.9ltr ho produsaun agua mineral iha área Manleuana.

Kompañia Central Moris, Unipessoal Lda hanesan kompañia nasionál no planu atu investe iha setór Pekuária ka Fan Naan Karau Fresku iha Timor-Leste, no Fatin iha Munisípiu Díli, Bemori.

Partisipa mós iha serimónia ne’e Diretór Jerál Kompañia Central Moris Unipessoal, Lda. Kufi Sequeira, Xefe Gabinete Ministériu Agrikultura no Peskas, Carlos A. Amaral, Prezidente Autoridade Aduaneira, José Abílio, Diretora Unidade husi Parserias Públiku Privada Ministériu das Finansas, Shalina M. Tilman, Diretór Jerál Ministériu Turizmu, Komersiu no Indústria, António da Costa, Diretór Jerál Ministériu Planeamentu no Investimentu Estratégiku, Venâncio Moniz, Diretór Ministériu Agrikultura e Peskas, Fernando E. A no assessor jurídiku sira.

url: http://timor-leste.gov.tl?lang=tp&p=22448