……………………………………………………………………………………………………………
Komunikadu Imprensa
Sorumutu Konsellu Ministrus iha Loron 10 fulan- jullu tinan 2019
Konsellu Ministrus hala’o sorumutuk iha Palásiu Governu, Dili no hahú ho aprezentasaun ida husi Ministériu Edukasaun, Juventude no Desportu, kona-ba preparasaun ba Jogu Desportivu XII CPLP, Timor 2020 ne’ebé sei hala’o husi loron 14 to’o 24 fulan-jullu tinan 2020. Programa ne’ebé Sekretáriu Estadu Juventude no Desportu, Nélio Isaac Sarmento, aprezenta ne’e inklui país partisipante sira, modalidade no infraestrutura ne’ebé oras ne’e prepara daudaun, hanesan estádiu lubun ida ba modalidade desportiva oin-oin, alojamentu, transporte, servisu médiku sira no seguransa, no seluk tan. Iha sorumutuk ne’e iha mós aprezentasaun kona-ba logotipu no múzika ne’ebé prepara espesiál ba eventu internasionál ida ne’e, atu membru sira Konsellu Ministrus nian halo apresiasaun.
Konsellu Ministrus, liuhusi Rezolusaun Governu nian ida analiza no aprova ona Memorandu Entendimentu ida entre Autoridade Nasionál Petróleu no Minerais, Department of Industry, Innovation and Science husi Commonwealth Austrália nian no Australian National Offshore Petroleum Safety and Environmental Management Authority, kona-ba kooperasaun entre autoridade reguladora sira relasiona ho Kampu Gás Bayu-Undan nian no ninia Gazodutu. Memorandu Entendimentu aprezenta husi ekipa ANPM nian, ne’ebé lidera husi Sr. Gualdino da Silva. Konsellu Ministrus fó podér tomak ba Sr. Gualdino da Silva atu asina Memorandu ne’e, hodi Autoridade Nasionál Petróleu no Minerais nia naran.
Sekretáriu Estadu Juventude no Desportu, Nélio Isac Sarmento, aprezenta ona rezolusaun Governu nian ida ne’ebé estabelese Komisaun Eventuál Interministeriál ida, kona-ba Koordenasaun Atividade sira iha Ámbitu Konferénsia Ministru Juventude no Desportu CPLP nian sira no iha XII Âmbitu Jogu Desportivu sira CPLP nian. Konsellu Ministrus analiza no aprova ona Rezolusaun ne’e.
Konsellu Ministrus aprova no fó podér tomak ba Ministra Edukasaun, Juventude no Desportu, Dulce de Jesus Soares, atu asina Proposta Alterasaun Akordu Kooperasaun iha Domíniu Juventude no Desportu, ne’ebé sei aprezenta iha XII Konferénsia Ministru Juventude no Desportu CPLP nian sira, ne’ebé sei hala’o iha Luanda, Angola entre loron 22 to’o loron 24 fulan-jullu tinan 2019.
Ministru Obras Públikas, Salvador Soares dos Reis Pires, aprezenta ba Konsellu Ministrus, proposta ida atu altera kontratu kona-ba konstrusaun auto-estrada Suai, ho n. ICB/ 007/MPNR-2013, ne’ebé selebra ona ho konsórsiu China Overseas Engineering Group Co. Ltd. e China Railway First Group Co. Ltd. (seksaun I – Suai-Fatukai/Mola), ne’ebé refere ba projetu Dezenvolvimentu Infraestrutura iha Tasi Mane. Alterasaun ne’e la implika kualkér aumentu ba kustu inisiál. Konsellu Ministrus aprova liuhusi Deliberasaun, proposta husi Ministru Obras Públikas nian. Remata