Governu Timor-Leste

Ministra Edukasaun, Juventude no Desportu, Dulce de Jesus Soares  ho Ministra Solidariedade, Sosiál no Inkluzaun, Armanda Berta dos Santos hala’o abertura, iha loron 13 fulan-Juñu tinan 2019, kolókiu kona-ba lian jestuál, iha salaun enkontru JL. Villa, Fatuhada, Dili.

Durante surumutu ne’e,  rona mós opiniaun balun husi manorin sira ne’ebé hanorin lian jestuál iha eskola sira, atu fó sai sira-nia opiniaun kona-ba pasu sira tuir mai hodi uza lian jestuál ho efetivu liu iha sistema edukasaun formál.

Ministra Edukasaun, Dulce de Jesus Soares, esplika, hanesan ministériu ne’ebé garante edukasaun ba ema hotu, tuir polítika governu ba daualu nian katak edukasaun inkluzivu sai mós prioridade.

Sorumutu ne’e hanesan asaun konkretu ida atu halo diskusaun entre organizasaun privadu sira, Ministra Solidariedade Sosiál no Inkluzaun, Ministra Edukasaun, Juventude no Desportu no Ministériu Saúde, apoiu mós husi parseiru sira, atu nune’e bele tau hamutuk dadus hodi identifika estudante sira ne’ebé ho defisiénsia tilun, nune’e ita  prepara formasaun ba profesór sira kona-ba lian jestuál.

Dulce de Jesus Soares  mós agradese ba esforsu hirak ne’ebé mak durante ne’e organizasaun privadu sira halo no husu ba ema hotu-hotu tenke hatene lian jestuál bázika, nune’e bele halo komunikasaun di’ak ho maluk sira ne’ebé ho defisiénsia tilun.