Semináriu Jornadas Orsamentais
VIII Governu Konstitusionál sei hala’o sorumutu iha semináriu“Jornada Orsamentais”, aban loron-27 fulan juñu, iha auditóriu Ministériu Finansas nian.
Diskusaun ida-ne’e sei ko’alia haleu tema orientadór “ ita agora iha ne’ebé” no “Ita atu bá ne’ebé” no, ko’alia mós kona-ba dezafiu, lisaun sira ne’ebé mak ita aprende ona no nesesidade saida maka ita presiza atu atinji ita-nia meta sira.
Iha parte dader, hafoin sesaun makloke no intervensaun hosi Primeiru-Ministru, tuir kedan ho sesaun ne’ebé dedika de’it ba programa, prioridade, estratéjia no meta sira ne’ebé maka atu atinji, ho objetivu atu kompreende dalan sá no objetivu saida de’it maka ita presiza hatuur, tatuir sei iha sesaun ida kona-ba dezempeñu, rezultadu no dezafiu sá iha area ezekusaun orsamentál, indústria finanseira no monetária. Ikusliu, sei aprezenta mós prosedimentu no kritériu atu defini tetu fiskál ba proposta Orsamentu Jerál Estadu tinan 2020 nian.
