Governu Timor-Leste

Reprezentante Gabinete Ministru Estadu Prezidénsia Konsellu Ministrus no Ministru Koordenador ba Asuntus Ekonomiku nian hala’o sorumutu ho responsável hosi Organizasaun Internasionál ba Migrasaun (OIM), hodi analiza koordenasaun kona-ba polítika migratória nasaun nian, iha loron-13 fulan maiu tinan 2019, iha Palásiu Governu, Díli.

Durante sorumutu ida-ne’e analiza tiha akordu internasional ne’ebé aplika iha nasaun, ne’ebé promove hosi Nasoins Unidas, hodi halo migrasaun ida seguru, ordenada no regular (GCM, sigla ingles), kona-ba dimensaun oioin hosi migrasoins internasionais sira ne’ebé mak Timor-Leste no xefe Estadu hosi nasaun 164 asina ona, iha fulan-dezembru tinan 2018, iha sidade marokina hosi Marraquexe. Akordu ida-ne’e aprezenta objetivu 23 no medida konkreta atu ajuda nasaun sira ne’ebé halo promosaun ba migrasaun ida ne’ebé seguru, regular no ordenada no iha ligasaun ho migrasaun, iha  fronteira, informasaun no integrasaun.

Iha sorumutu ne’e, diskuti tiha mós kona-ba koordenasaun kona-ba oinsá kria no atualiza medida atu rekolla dadus migratóriu sira hodi halo planu polítika migratoria sira ne’ebé maka fó apoiu ba dezenvolvimentu nasionál, la’o-hanesan ho perfil migratóriu nasaun nian. Dadus ida-ne’e sei fó dalan atu kompreende munisípiu sira ne’ebé maka nia taxa migrasaun a’as liu no nia impaktu ekonómiku ba komunidade sira iha-ne’ebá no sei fó dalan mós atu bele hatene kuantidade no karaterístika hosi vizitante sira no fó dalan atu ajusta poltika ekonómika sira.