Governu Timor-Leste

Ministru Estadu Prezidénsia Konsellu Ministrus, Agio Pereira, no Ministru Transportes no Komunikasoins, José da Silva, hala’o sorumutuk ohin, loron 30 fulan-maiu tinan 2019, iha Palásiu Governu, iha Dili, ho ekipa ida husi peritu sira DLA Piper nian, ho Prezidente Konsellu Administrasaun Autoridade Aviasaun Sivíl Timor Leste nian (AACTL, sigla iha lian portugés), Ana Rosália Ximenes Varela, ho Prezidente Administrasaun Aeroportu no Navegasaun Aérea Timor-Leste nian (ANATL E.P.), Romualdo da Silva no responsavel sira husi instituisaun relevante sira seluk.

Hafoin sorumutuk entre Primeiru-Ministru no Ministru Estadu ho peritu sira DLA Piper nian, ne’ebé hala’o iha loron 23 fulan-maiu tinan 2019, sorumutuk ida-ne’e ninia objetivu mak atu hetan estratéjia sira ba implementasaun polítika no planu hirak ne’ebé AACTL no ANATL iha ona ba setór aviasaun sivíl nasionál, atu asegura transporte aéreu no evita izolamentu ne’ebé impoin husi merkadu kompetitivu indústria husi liña aérea nian sira.

AACTL maka Institutu Públiku ne’ebé sai nu’udar responsavel ba supervizaun, regulamentasaun, fiskalizasaun no inspesaun ba aviasaun sivíl Timor-Leste nian no ANATL maka empreza públiku ne’ebé iha kompeténsia ba esplorasaun no dezenvolvimentu infraestrutura aeroportuária no navegasaun aérea nian sira.

DLA Piper hanesan firma advokasia globál ho advogadu sira iha nasaun 400 resin hanesan Amérika, Europa, Oriente Médiu, Áfrika no Ázia-Pasífiku no ho kliente sira iha mundu tomak.

Partisipa mós iha sorumutuk ne’e peritu na’in tolu husi DLA Piper, Stewart Winspear, Peter Ashford no Emilie Barton, reprezentante sira husi Ministériu Planeamentu no Investimentu Estratéjiku, husi Prezidénsia Konsellu Ministrus, husi Ministériu Negósius Estranjeirus no Kooperasaun, husi Gabinete Ministru Koordenadór Asuntus Ekonómikus no husi Gabinete Fronteira Marítima sira nian.