Governu Timor-Leste

Prezidente no Vise-Prezidente foun hosi Institutu Nasionál Formasaun Dosente no Profisionál Edukasaun (INFORDEPE), simu pose hosi Ministra Edukasaun Juventude no Desportu (MEJD), Dulce de Jesus Soares, ne’ebé akompaña hosi Vise-Ministru MEJD, João Freitas Soares, no Prezidente Funsaun Públika, Faustino Cardoso, iha loron 10 fulan-maiu, iha INFORDEPE, iha Balidi.

 Iha nia diskursu, MEJD husu ba sira ne’ebé simu ona pose atu serbisu di’ak nafatin, liu-liu iha área formasaun nian atubele garante kualidade no kriatividade profesór sira nian iha sira-nia knaar tomak.

 Prezidente KFP, Faustino Cardoso, hato’o parabéns ba MEJD tanba revitaliza dirijente sira hosi instituisaun ida-ne’e, ne’ebé iha papél importante tebes iha kapasitasaun dosente sira nian.

 “Ha’u hakarak agradese ba responsavel tuan sira tanba harii ona baze sira ne’ebé forte iha INFORDEPE no husu ba lider foun sira atu mantein fundasaun sira ne’e ba ninia dezenvolvimentu”, Prezidente KFP dehan.