Governu Timor-Leste

Konferénsia internasionál daruak nian kona-ba destinu turístiku emerjente sira, hala’o iha loron 17 fulan-maiu, iha Sentru Konvensoins Díli, ho tema “Turizmu ba Pás, Armonia no Fraternidade: Dezenvolvimentu Turizmu Relijiozu no Peregrinasaun”. Ministru Estadu Prezidénsia Konsellu Ministrus no Ministru Turizmu, Komérsiu no Indústria ein ezersísiu, hala’o abertura ofisiál ba eventu ne’ebé konta ho partisipasaun hosi líder polítiku no relijiozu sira, no espesialista nasionál no internasionál sira hosi área turizmu.

Konferénsia ne’e organiza husi ajénsia kooperasaun amerikana USAID, hamutuk ho Ministériu Turizmu, Komérsiu no Indústria no Institutu Teknolojia Díli (DIT), ho objetivu prinsipál atu hakle’an potensiál Timor-Leste nian, ne’ebé seidauk esplora ba merkadu turizmu relijiozu, nu’udar forma diversifikasaun ekonomia nasionál nian.

Timor-Leste iha fatin sira, hanesan Kristu Rei no santuáriu Virjen Maria iha Foho Ramelau, ne’ebé lokaliza iha fatin sira ho natureza ne’ebé furak, no komunidade relijioza oin-oin ne’ebé eziste iha nasaun ne’e iha relasaun armonia entre sira, situasaun ne’ebé halo turizmu relijiozu sai nu’udar opsaun ida ne’ebé di’ak iha kontestu sosiedade timoroan nian.

Ministru Estadu, iha ninia diskursu abertura, salienta “importánsia hosi eventu ne’e tanba permite fahe esperiénsia no hetan koñesimentu kona-ba diresaun turizmu nian iha Timor-Leste, liuliu turizmu relijiozu, no ninia relasaun no potensiál ba dezenvolvimentu no kreximentu sosioekonómiku nasaun nian”. Nia hatutan tan katak objetivu ida hosi “tipu turizmu ida ne’e atu promove diálogu entre ema no kultura sira no prátika ida-ne’e tenke sustenta iha turizmu ida ne’ebé solidáriu, hodi apoiu dezenvolvimentu sustentavel ba komunidade lokál sira”.

Agio Pereira hateten katak, “importante liu mak investe duni iha foin-sa’e sira, hodi asegura formasaun téknika no ne’ebé orienta ba atividade turístika oioin” no “estabelese inisiativa, estratéjia no ekipamentu komplementár sira ne’ebé bele esplika arkitetura no arte iha ninia komponente hotu-hotu: funsionál, litúrjika no simbólika sira.

Ministru Estadu hatutan tan katak “Governu hatudu ona prova sira husi nia esforsu maka’as ba iha área emerjente ida-ne’e, iha nivel globál, turizmu nian, hodi estabelese, iha Planu Estratéjiku Dezenvolvimentu nian ba períodu tinan 2011 to’o 2030, katak turizmu relijiozu nu’udar objetivu prioritáriu ida mós husi Polítika Nasionál Turizmu nian”.

Konferénsia ne’e hetan partisipasaun husi Ministru Defeza, Filomeno da Paixão de Jesus, Ministra Finansas iha ezersísiu, Sara Lobo Brites, eis-Prezidente Repúblika, José Ramos-Horta, eis-Ministru Turizmu, Manuel Florêncio da Canossa Vong, líder sira husi konfisaun relijioza sira ne’ebé eziste iha país, reprezentante sira husi PNTL no F-FDTL, espesialista internasionál sira husi área turizmu relijiozu no parseiru sira dezenvolvimentu nian.