……………………………………………………………………………………………………………
Komunikadu Imprensa
Sorumutuk Konsellu Ministrus loron 15 fulan-maio tinan 2019
Konsellu Ministrus hala’o sorumutuk iha Palásiu Governu, iha Díli, no aprova tiha proposta Dekretu Governu, ne’ebé aprezenta hosi Ministru Justisa Manuel Cárceres da Costa, ne’ebé maka aprova kona-ba Regulamentu Estájiu ba Investigadór sira hosi Kareira Espesiál Investigasaun Kriminal nian no ba Espesialista Laboratóriu Polísia Sientífika no Investigasaun Kriminal (PCIC). Ho aprovosaun ba diploma ida-ne’e sei kontribui hodi asegura formasaun no fó kualifikasaun ba profisionál sira ne’ebé maka tama iha rejime karreira espesiál ba Polísia Sientífika no Investigasaun Kriminal, hodi kumpri saida maka hatuur ona iha lei no tuir programa VIII Governu Konstitusionál nian, no hodi haree mós konsolidasaun ba setor justisa hodi tada ba instituisaun ba ida-ne’e rekursu umanu ne’ebé kompetente, independente no profisionál.
Ministru Agrikultura no Peska, Joaquim José Gusmão dos Reis Martins, aprezenta proposta Rezolusaun Governu kona-ba Estatutu Konsellu Nasional Seguransa no Soberania Alimentar no Nutrisionál Timor-Leste nian (KONSSATIL). Rezolusaun Governu ne’e hakarak defini natureza, objetivu, regulamentu sira, kompozisaun no funsionamentu hosi KONSSATIL, nuudar órgaun interministeriál atu halo koordenasaun no elaborasaun, implementasaun, monitorizasaun no avaliasaun ba polítika públika kona-ba seguransa no soberania alimentar no nutrisional. Objetivu hosi KONSSATIL maka assegura implementasaun hosi PEDN no programa Governu kona-ba matéria ne’e, dezenvolve no promove mekanismu atu halo koordenasaun no hodi fortalese kapasidade instituisaun públika sira no rekursu hirak ne’ebé eziste ona, ho objetivu atu reduz inseguransa alimentar no má nutrisaun no hodi implementa planu ba seguransa alimentar no nutrisaun. Rezolusaun Governu ida-ne’e sei analiza fila fali iha reuniaun Konsellu Ministru tuir mai.
Konsellu Ministru analiza Deliberasaun rua, ne’ebé aprezenta hosi Ministru Obras Públikas, Salvador Soares dos Reis Pires, kona-ba aleterasaun ba kontratu públiku empreitada nian atu hadi’ak kualidade no halo manutensaun ba estrada Natarbora-Laklubar, no ba estrada Manatutu-Baukau. Deliberasaun Konsellu Ministru ne’e sei fó dalan atu estende durasaun ba kontratu, lahó kustu adisionál no laiha mudansa ba termu no kondisaun kontratu nian tanba, ho objetivu atu kompensa atrazu no interupsaun hosi servisu ba obra sira tan udan bo’ot ne’ebé akontese iha área ne’ebá. Deliberasaun rua ne’e hetan aprovasaun hotu.
Ministru Obras Públikas aprezenta mós Proposta Deliberasaun ne’ebé maka aprova hosi Konsellu Ministru kona-ba aprovasaun ba prosedimentu aprovisionamentu nian atu hola mina ba sentrál eletrika iha Hera no Betanu ba tinan ida, hahú hosi fulan Outubru tinan 2019 to’o fulan Setembru tinan 2020, ho objetivu garante funsionamentu sentrál eletrika no fornesimentu enerjia ba Timor laran tomak. REMATA