Sorumutu Konsellu Ministrus loron 17 fulan-abril tinan 2019

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus loron 17 fulan-abril tinan 2019

Konsellu Ministrus hala’o sorumutuk iha Palásiu Governu, iha Dili no analiza ona aprezentasaun husi Sekretariadu Grupu Traballu Revizaun Nasionál Voluntária (sigla iha lia inglés VNR- Voluntary National Review) kona-ba Objetivu sira husi Dezenvolvimentu Sustentável (ODS).

Durante aprezentasaun ne’e, Sekretariadu Grupu Traballu submete ba membru Governu sira atu halo konsiderasaun, ba testu ho mensajen-xave hamutuk sanulu-resin-ida, ne’ebé aliña ho Programa Governu VIII nian no ne’ebé maka sai nu’udar eixu prinsipál husi komunikasaun ne’ebé país ne’e hakarak tranzmite kona-ba progresu iha implementasaun ODS nian. Membru Governu sira aprezenta rekomendasaun sira kona-ba alterasaun ba testu finál husi mensajen-xave sira ne’ebé sei haruka ba sede Organizasaun Nasoins Unidas nian to’o loron 17 fulan-maiu tinan 2019. Konsellu Ministrus aprova tiha ona, iha sorumutuk loron 13 fulan-fevereiru tinan 2019, rekomendasaun prinsipál sira ba Revizaun Nasionál Voluntária no durante fulan-fevereiru no fulan-marsu hala’o ona konsulta ho organizasaun sira sosiedade sivíl nian. Relatóriu finál ne’e no nia mensajen-xave sira sei aprezenta iha Forum Polítiku Nivel Aas Nasoins Unidas nian, ne’ebé sei hala’o husi loron 9 to’o loron 18 fulan-jullu tinan 2019, iha Novaiorke.

Ministru Ensinu Superiór, Siénsia no Kultura, Longuinhos dos Santos, aprezenta ona proposta Rezolusaun Governu nian, ne’ebé aprova ona husi Konsellu Ministrus ho alterasaun sira kona-ba nomeasaun Prezidente no Viseprezidente ba Konsellu Ezekutivu Institutu Nasionál Siénsias no Teknolojia (INCT - sigla iha lian portugés). Tuir Planu Estratéjiku Dezenvolvimentu nian no tuir Programa Governu nian, diploma ida-ne’e ninia objetivu maka nomeia José Cornélio Guterres atu ezerse mandatu ida ba tinan haat, hanesan Prezidente Konsellu Ezekutivu ba (INCT - sigla iha lian portugés) no nomeia mós Afonso de Almeida, ba kargu Viseprezidente Konsellu Ezekutivu INCT nian, ba tinan haat oin mai. INCT ninia misaun maka promove difuzaun no divulgasaun kultura, koñesimentu sientífiku no teknolójiku, ensinu siénsia no teknolojia nian, nune’e mós disponibilizasaun dadus no informasaun sira ne’ebé iha relasaun ho interese nasionál.

Konsellu Ministrus analiza ona proposta ne’ebé aprezenta husi Sekretáriu Estadu ba Asuntus Kombatentes Libertasaun Nasionál, Gil da Costa Monteiro ‘Oan Soru’, kona-ba memorandu entendimentu entre Timor-Leste no Governu Tazmánia ne’ebé sei loke dalan ba veteranu nasionál sira atu partisipa iha programa informasaun no dezenvolvimentu profisionál nian ida ba jestaun no prezervasaun parke nasionál sira, ho objetivu atu konserva patrimóniu naturál no kulturál nasionál, kontribui atu hadi’a kualidade moris komunidade sira-nian no ba promosaun dezenvolvimentu turizmu istóriku no sustentavel. Proposta ne’e sei hetan fali análize iha sorumutuk oinmai hafoin Ministériu relevante sira fó sira-nia paresér. REMATA

   Ba leten