Governu asina akordu ho Kruz Vermella hodi fó apoiu ba dezastres naturais
Governu konstitusionál VIII, liuhusi Sekretáriu Estadu Protesaun Sivil (SEPS), Alexandrino de Araújo, asina ona iha loron 11 fulan-abril, memorandu entendimentu ida ho Prezidente Kruz Vermella Timor-Leste (KVTL), Madalena Hanjan, ba kooperasaun jestaun nian no hatan ba dezastres naturais.
Akordu ida-ne’e iha ninia objetivu atu reforsa sinerjia rekursus ba parte sira atu hadi’a kapasidade rekursus umanus nian iha preparasaun no jestaun dezastres naturais. Akordu ne’e sei dura ba tinan lima, durante períodu 2019 to’o 2024 no sei bele hanaruk bainhira karik parte sira konkorda malu.
Alexandrino de Araújo hatete katak “importánsia husi akordu ida-ne’e ba servisu koordenasaun téknika nian entre instituisaun sira” no nia hateten tan katak “kooperasaun ida-ne’e sei permiti katak CVTL atu apoia Sekretáriu Estadu Protesaun Sívil atu hatán ba populasaun sira-nia situasaun kona-ba dezastres naturais”.
Governante ne’e haktuir katak “dadus ne’ebé mak rekolla ona kona-ba ba fulan hirak ikus ne’e nian, rejista ona situasaun 1225 ne’ebé presiza apoiu umanitáriu urjente, tanba kauza husi udan ne’ebé mak maka’as tebtebes”. Nia hatutan tan katak “Iha mós zona barak ne’ebé la fasilita atu rekolla dadus no ekipa kontinua iha terrenu hodi halo rejistu ba akontesimentu sira”.
Sekretáriu Estadu ne’e hatete mós katak “Governu daudaun ne’e, hala’o hela prosesu konkursu públiku ba akizisaun bein alimentár no bein sira seluk kona-ba nesesidade dahuluk nian atu apoia populasaun ne’ebé mak afeta husi katástrofe sira iha kazu emerjénsia nian sira no fó apoiu ba harii fali sira-nia uma”.
Konforme difini ona iha Lei Orgánika Governu SEPK atu hala’o ninia knaar iha mós kooperasaun ho Ministériu Solidariedade no Inkluzaun iha apoiu ba vítima sira dezastres nian.
Aleinde Sekretáriu Estadu Potresaun Sívil no Prezidente Kruz Vermella Timor-Leste nian marka mós prezensa iha serimónia ne’e parseiru sira dezenvolvimentu nian, Diretór-Jerál Servisus Operasionais, Diretór-Jerál Servisu Migrasaun, Diretór Nasionál sira, funsionáriu públiku sira, estudante no estajiáriu sira.
