SEFOPE asina tan Memorandum Entendimentu ida ho Governu Federal Austrália kona-ba programa PLS (Pasific Labour Scheme) ne’ebé traballadór sira ba servisu ho durasaun tinan tolu, tan ne’e husu ba jovens sira atu hakbesik aan ba iha sentru formasaun hodi eleva tan kapasidade no koñesimentu iha nivel mediu atu bele kompete  iha merkadu traballu ne’e.

Hato’o lia hirak ne’e husi Sekretariu Estadu Formasaun Profisionál no Empregu (SEFOPE) Julião da Silva iha komferensia de imprensa ne’ebé hala’o iha salaun enkontru SEFOPE iha loron 03 Abril 2019.

Iha semana hirak liu ba SEFOPE hetan nomeasaun husi Konsellu Ministru atraves liuhusi Primeiru Ministru oitavu Governu konstituisionál ninian hodi fó kompetensia tomak ba SEFOPE atu asina MoU ida ho Governu Federal Austrália liu husi (Minister For Foreign Affairs) atu Timor-Leste partisipa iha programa PLS.

Governu Federal Australia fó oportunidade ba Governu Repúblika Demokrátika Timor-Leste kada tinan sei haruka traballadór liu rihun ida atu bele ba servisu iha programa PLS nian.

Programa ne’ebé haruka traballadór timoroan sira ba servisu iha rai liur hanesan meius ida Estadu ka Governu halo hodi fasilita joventudi timorenses bele hetan ekonomia ne’ebé di’ak iha ema nia nasaun no mós bele aprende buat foun ruma husi nasaun sira seluk ne’ebé ba.

Iha biban ne’e Governante ne’e mós hateten programa PLS (Pasific Labour Scheme) sei la prejudika programa Seasonal Worker Program (SWP) ne’ebé iha tinan 2012 Governu Austrália fó ona oportunidade ba Governu Timor-Leste hodi involve.