Semináriu kona-ba knaar komunikasaun sosiál nian bainhira halo kobertura no supervizaun finansas públikas nian

Iha loron 3 fulan-abríl, hala’o sesaun abertura husi semináriu valorizasaun nian ida ba jornalista sira Timor-Leste nian, kona-ba “Instituisaun Superiór Kontrolu sira no Estadu Direitu Demokrátiku: Knaar Komunikasaun Sosiál nian”. Semináriu ida-ne’e hala’o iha ámbitu projetu “Parseria ba Jestaun no Supervizaun kona-ba Finansas Públikas”, (PFMO – Public Financial Management and Oversight), ne’ebé organiza hamutuk ho Konsultóriu Lian Portugés no liuhusi koordenasaun ho Sekretaria Estadu Komunikasaun Sosiál (SEKOMS). Semináriu ne’e sei hala’o to’o loron 12 fulan-abríl, iha Sentru Kulturál Embaixada Portugál nian.

PFMO ne’e envolve entidade timoroan lubun ida no hakarak kontribui ba dezenvolvimentu sustentavel iha Timor-Leste, liuhusi hametin planeamentu, jestaun, monitorizasaun, auditoria, responsabilizasaun no supervizaun finansas públikas nian, atubele fó prestasaun servisu públiku sira ne’ebé efikás, íntegra, transparente, responsavel liután no ne’ebé orienta ba sidadaun.

Asaun formasaun no divulgasaun nian ida-ne’e, buka atu fahe koñesimentu jornalista sira-nian kona-ba modelu jestaun no supervizaun finansas públikas nian, liuhusi koñesimentu kona-ba estatutu, funsaun no knaar instituisaun superiór kontrolu sira iha País ne’e no atu identifika knaar no serbisu husi jornalista no órgaun sira komunikasaun sosiál nian bainhira halo kobertura no supervizaun finansas públikas nian.

Objetivu jerál sira husi formasaun ida-ne’e mak atu analiza sistema demokrasia nian no Estadu Direitu no autoridade auditoria nian sira iha País ne’e no rekoñese dezafiu prinsipál sira ne’ebé meiu komunikasaun sosiál hasoru atu garante servisu informativu ida ne’ebé izentu, , independente tuir lei no transparente, ba sidadaun sira hodi harii sinerjia no partilla ho autoridade auditoria nian sira, nune’e kria oportunidade atu haforsa apoiu husi atór hirak ne’e hodi garante asesu ba informasaun ofisiál kona-ba polítika públika sira, tuir saida maka hatuur iha Lei no iha Konstituisaun Repúblika nian.

Sei partisipa iha Semináriu ida-ne’e jornalista maizumenus 30 husi imprensa hakerek, rádiu, televizaun, jornalizmu dijitál no asesór sira komunikasaun nian. Semináriu ne’e dirije husi UIC – Camões, ho partisipasaun husi formadór timoroan no internasionál sira, ne’ebé maka maihusi área profisionál oioin, liuliu espesialista sira husi Parlamentu Nasionál, Kámara Kontas, Sentru Formasaun Jurídika, Konsellu Imprensa, Organizasaun sira husi Sosiedade Sivíl, Órgaun sira Komunikasaun Sosiál nian no Konsultór Espesialista sira ne’ebé hala’o knaar kona-ba kestaun ne’ebé liga ba jestaun no supervizaun finansas públikas nian.

Entidade sira ne’ebé partisipa iha eventu abertura nian ne’e maka Xefe Gabinete Sekretaria Estadu Komunikasaun Sosiál, Júlio Gonçalves, Embaixadór Portugál nian iha Timor-Leste, José Pedro Machado Vieira, no reprezentasaun ida husi Delegasaun Uniaun Europeia nian iha Timor-Leste.

url: http://timor-leste.gov.tl?lang=tp&p=21553