……………………………………………………………………………………………………………
Komunikadu Imprensa
Governu anunsia Komisaun Organizadora ida ba Konsulta Popular no INTERFET nia Aniversáriu
Iha 30 agostu 2019, Timor-Leste komemora Aniversáriu Konsulta Popular ba dala 20. Iha loron ida ne’e iha tinan 20 liu ba, povu Timoroan ezerse sira nia direitu ba auto-determinasaun no vota ho maioria ba independênsia. Momentu ida ne’e realiza povu Timor-Leste nia mehi naruk hodi hetan soberania ba sira nia futuru.
20 setembru marka aniversáriu Forsa Internasional iha East Timor ka INTERFET, forsa manutensaun paz to’o mai iha Timor-Leste, hodi hatan ba krizi umanitária no seguransa hosi 1999-2000. INTERFET, ho Austrália nia lideransa, envolve nasaun 21 ne’ebé halo kontribuisaun importante ba iha tempu susar tebes ida iha istória Timor-Leste nian.
Governu Timor-Leste anunsia estabelesimentu Komisaun Organizadora ba Aniversáriu ne’e – ekipa inter-ministerial ida, ho kna’ar atu jere no koordena aspetu hotu ne’ebé relasiona ho eventu aniversáriu ne’e nian.
Primeiru-Ministru, Taur Matan Ruak, fó sai Despaxu no: 04/PM/II/2019 iha loron 18, fulan fevereiru, hili Kay Rala Xanana Gusmão, líder Rezistensia Timorense no Primeiru eleitu Prezidente no eis-Primeiru-Ministru Timor-Leste nian, sai hanesan Prezidente ba Komisaun Organizadora ne’e.
Nune’e, Komisaun Organizadora ne’e hahú hala’o tiha ona nia servisu hodi prepara ba aniversáriu ne’e.
Portavoz governu nian Ministru Agio Pereira hateten aniversáriu ba dala 20 ne’e okaziaun ida hodi reflete kona-ba ita nia nasaun soberana nia loron moris no dékadas rua dahuluk iha ita nia dezenvolvimentu. Lao tuir lideransa Kay Rala Xanana Gusmão nian, Komisaun Organizadora sei dezenvolve programa kompletu ida ne’ebé inklui serimonia ofisial, espozisaun, komemorasaun, kompetisaun desportiva no konsertu.
**
Atu fó onra ba okaziaun istórika ida ne’e, governu husu maluk sira hotu nia partisipasaun, sira ne’ebé karik iha fotografias, dokumentus, artes ne’ebé relasiona ho periodu ida ne’e iha sira nia kolesaun privadu. Komisaun Organizadora oras ne’e daudaun dezenvolve hela espozisaun ida ba kolesaun durante periodu ida ne’e nian, la’os halibur hosi Timor-Leste nia laran deit maibé mundu tomak.
Bele mai entrega maluk sira nia kolesaun iha Komisaun Organizadora nia Sekretáriadu iha Gabinete Fronteiras Marítimas iha Palásiu Governu. Komisaun sei halo kopia ka scan ba fotografia ka dokumentu orijinal hodi inklui mos iha espozisaun ne’e.
Atu hatene liu tan kona-ba inisiativa ida ne’e, halo favor kontaktu Felismina Carvalho dos Reis iha +670 7742 5544 ka Domingos Guterres iha +670 7705 5344 ka email: info@gfm.tl