Governu Timor-Leste

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus loron 20 fulan-marsu tinan 2019

Konsellu Ministrus hala’o sorumutuk iha Palásiu Governu, iha Dili, no asiste ona aprezentasaun husi rezultadu peskiza nasionál nian kona-ba opiniaun públika iha Timor-Leste. Peskiza ne’e hala’o iha fulan-outubru no fulan-novembru tinan 2018, husi Institutu Republikanu Internasionál (IRI – International Republican Institute). Estudu ne’e hatudu katak nivel interese populasaun nian aas iha prosesu polítiku nasionál no aprezenta katak buat hirak ne’ebé sai hanesan preokupasaun prinsipál sidadaun sira nian maka kualidade estrada nian, asesu ba bee moos no dezempregu.

Ministru Negósius Estranjeirus no Kooperasaun, Dionísio da Costa Babo Soares, aprezenta ona proposta kona-ba Deliberasaun Konsellu Ministrus nian kona-ba Programa Estratéjiku Kooperasaun nian (PEC, sigla iha lian portugés hudi Programa Estratégico de Cooperação) entre Portugál no Timor-Leste ba períodu husi tinan 2018 to’o 2022. PEC define setór hirak ne’ebé sai nu’udar prioridade husi intervensaun maka “Konsolidasaun Estadu Direitu no Governasaun Di’ak”, “Edukasaun, Formasaun no Kultura” no “Dezenvolvimentu Sosioekonómiku Inkluzivu”. Konsellu Ministrus mós aprova ona proposta akordu nian husi PEC ne’ebé sei prevee atu asina iha fulan-jullu tinan 2019 husi Ministru Negósius Estranjeirus no Kooperasaun nasaun rua ne’e nian.

Memorandu Entendimentu entre Governu Repúblika Demokrátika Timor-Leste no Governu Austrália nian kona-ba sidadaun nasionál sira-nia partisipasaun iha Programa Laborál Pasífiku (Pacific Labour Scheme). Programa Governu Austrália nian ne’e, ne’ebé hahú iha fulan-juñu tinan 2018, fó biban ba traballadór sira hosi nasaun oin-oin iha rejiaun Pasífiku atu kandidata an ba empregu sira ho kualifikasaun baixa ka média iha área rurál sira iha Austrália. Programa Laborál Pasífiku ne’e fó dalan, iha sorin ida, atu sidadaun timoroan sira bele hetan koñesimentu no esperiénsia serbisu nian no, iha sorin seluk, permite empregadór australianu sira bele iha asesu ba  maundobra ne’ebé bele konfia.

Konsellu Ministrus fó podér tomak ba Sekretáriu Estadu Formasaun Profisionál no Empregu, Julião da Silva, atu asina memorandu entendimentu ne’e.

Konsellu Ministrus analiza ona alternativa no akordu hirak ne’ebé iha posibilidade atu halo ligasaun aérea internasionál sira, ne’ebé Ministru Transporte no Komunikasoins, José Agostinho da Silva, aprezenta ho objetivu atu normaliza servisu transporte aéreu iha nasaun ne’e. Kona-ba ida-ne’e, Konsellu Ministrus fó podér tomak ba Ministru Transportes no Komunikasoins atu asina Akordu ida entre Governu Repúblika Timor-Leste no Governu Malázia kona-ba servisu sira transporte aéreu nian entre nasaun rua ne’e. REMATA