Governu hato’o kondolénsia ba Gil da Costa Alves nia mate

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Governu hato’o kondolénsia ba Gil da Costa Alves nia mate

Governu triste tebes ho eis-Ministru Turizmu, Komérsiu no Indústria husi Governu Konstitusionál IV, Repúblika Demokrátika Timor-Leste, Gil Alves, nia mate, iha loron 17 fulan-marsu tinan 2019.

Gil Alves moris iha Maubisi, iha loron 17 fulan-setembru tinan 1958. Na’i-ulun ne’e sai nu’udar ekonomista no profesór iha Fakuldade Ekonomia, iha Universidade Atma Jaya, iha Indonézia, husi tinan 1990 to’o 1993.

Uluk, nia sai mós hanesan Sekretáriu-Jerál Asosiasaun Sosiál Demokrata Timor (ASDT) nian no, hafoin eleisaun lejizlativa iha loron 30 fulan-juñu tinan 2007, ninia partidu integra iha koligasaun AMP (Aliansa Maioria Parlamentár) nian, no Gil Alves simu pose nu’udar Ministru Turizmu, Komérsiu no Indústria iha loron 8 fulan-agostu tinan 2007, iha Governu Konstitusionál IV, ne’ebé lidera husi Kay Rala Xanana Gusmão.

Iha tinan 2018, Gil Alves hala’o funsaun hanesan Viseprezidente Kámara Komérsiu no Indústria Timor-Leste ba asuntu Ázia nian.

Governu Konstitusionál VIII, hamutuk ho lider no instituisaun Timor-Leste nian sira seluk, fó omenajen ba Gil Alves no hato’o sentida kondolénsia ba família no belun sira eis-Governante ne’e nian. Remata

 

   Ba leten