Formandu na’in-117 simu sertifikadu iha área indústria marítima no konstrusaun sivíl nian

Sekretáriu Estadu ba Formasaun Profisionál no Empregu (SEFOPE), Julião da Silva, ne’ebé akompaña husi Ministru Transportes no Komunikasoins, José Agustinho da Silva, no husi Sekretáriu Estadu Komunikasaun Sosiál (SEKOMS), Merício Juvenal dos Reis “Akara”, iha loron 1 fulan-marsu tinan 2019 partisipa ona iha serimónia entrega sertifikadu nian, iha área indústria marítima no konstrusaun sivíl nian, ba formandu na’in-59, husi Institutu Politékniku Betanu (IPB), na’in-34, husi indústria marítima, no na’in-24, husi F-FDTL, iha Sentru Formasaun Tibar (CNEFP, Tibar).[Confirmar a instituição de origem dos formandos, para clarificar o texto.]

Iha ninia diskursu, Julião da Silva, ko’alia filafali “kompromisu Governu Konstitusionál VIII nian, hodi, liuhusi SEFOPE, hasa’e investimentu iha rekursus umanus, atu sira bele hatán ba nesesidade sira merkadu serbisu nian iha rai-laran no iha rai-li’ur”. Sekretáriu Estadu ne’e mós hatutan tan katak “ida-ne’e hanesan kontribuisaun ida ba dezenvolvimentu nasaun nian hodi hamenus númeru dezempregu iha Timor-Leste”. Na’i-ulun ne’e hateten tan katak “aleinde importánsia setór privadu nian, Governu mós tenke utiliza rekursu umanu hirak ne’e”.

Julião da Silva husu ba “Ajénsia Internasionál, Ministériu no ba responsavel setór privadu sira atubele loke tan vaga, no labele buka de’it ema sira ne’ebé ho esperiénsia profisionál, atu nune’e fó oportunidade ba foin-sa’e sira”.

Ikus liu, Sekretáriu Estadu ne’e agradese ba CNEFP-Tibar ne’ebé, “ liuhusi asaun formasaun oioin ne’ebé dinamiza, fó biban ba foin-sa’e sira hodi hasa’e sira-nia kapasidade iha área oioin” no agradese mós “ ba Ajénsia Kooperasaun Alemã (GIZ) tanba ninia apoiu ne’ebé fó ona ba Governu Timor-Leste iha área formasaun ba foin-sa’e timoroan sira.

url: http://timor-leste.gov.tl?lang=tp&p=21304