Repúblika Demokrátika Timor-Leste no Repúblika Indonézia halao Reuniaun Esploratória Daruak kona-ba Delimitasaun Fronteiras Marítimas iha Singapura husi 26 to’o 27 fevereiru, 2019.

Sorumutu ida ne’e tuir fali reuniaun esploratória ikus ne’ebé nasaun rua ne’e halao ona iha Bali iha dezembru 2018. Xefe Negosiador, Kay Rala Xanana Gusmão, mak lidera Timor-Leste nia delegasaun no Damos Dumoli Agusman, Diretor Jeral ba Asuntus Legais no Tratadus Internasionais, Ministériu Negosius Estranjeirus, mak lidera Indonézia nia delegasaun.

Nasaun rua ne’e hasoru malu ho neon nakloke hodi ko’alia ho klean liutan kona-ba kestaun tékniku no administrativu ne’ebé relasiona ho delimitasaun fronteiras marítimas.

Kay Rala Xanana Gusmão hateten, “Reuniaun iha Singapura ne’e haforsa tan reuniaun ne’ebé halao ona iha Bali no reprezenta hakat importante ida tan ba negosiasaun formal kona-ba fronteiras marítimas ho Indonézia.”

Governu nia portavoz, Ministru Agio Pereira, hateten “Reuniaun Esploratória iha Singapura ne’e hatudu relasaun ne’ebé buras entre Timor-Leste no Indonézia ho konkordansia hodi delimita ita nia fronteiras marítimas tuir Nasoens Unidas nia Konvensaun kona-ba Lei Tasi nian.”