Semana Akadémika Institutu Defeza Nasionál (IDN) nian hala’o iha iha Salaun São José, iha Katedral Díli, iha loron-4 no loron-5. Iha loron dahuluk, eventu ne’ebé hanaran ‘’ Loron Estratéjia’’, espesialista nasionál no internasionál sira debate tema kona-ba ‘’ Instabilidade Polítika no Suspreza Estratéjika’’ no fó omenajén ba líder Rezisténsia Nasionál, Kay Rala Xanana Gusmão, iha kuadru Komemorativu Loron Veteranu sira nian.
IDN maka nuudar responsável ba estudu, investigasaun no ensinu ba matéria sira kona-ba defeza nasionál, hodi kontribui halo divulgasaun no debate ba problema boot nasionál no konjuntura internasionál kona-ba defeza nasionál.
Ministru Estadu Prezidénsia Konsellu Ministru, Agio Pereira, ho reprezenta Primeiru-Ministru, iha diskursu abertura eventu ne’e, hahú ho kongratula alunu sira IDN nian no rekoñese kontribuisaun IDN nian ‘’ne’ebé valoriza no forma kuadru sira hosi Forsa Armada no Servisu Seguransa, nomós kuadru hosi tékniku superiór administrasaun públika, organizmu governamentál no seluktan hosi sosiedade sivil’’, ho temi liu ‘’dezenvolvimentu, iha tinan badak nia laran, no eselénsia hosi institutu ne’e’’
Ministru Estadu mós temi liután kona-ba oportunidade sira ne’ebé Timor-Leste iha ‘’ tanba hatene oinsá kapitaliza ninia esperiénsia no kapitál rejiaun’’, ‘’rejiaun ida ne’ebé potensiál tebetebes iha inovasaun no komérsiuno, ida-ne’e importante duni ba seguransa rejiaun nian’’, aleinde ‘’oportunidade investimentu no dezenvolvimentu’’ ne’ebé ‘’ oportunidade foun mosu mai ita-nia nasaun ho assinatura tratadu, halo ona tinan ida, entre Timor-Leste no Austrália kona-ba fronteira marítima permanente ida-idak nian iha Tasi Timor’’.
Agio Pereira ramata nia intervensaun ho fó omenajén ba Kay Rala Xanana Gusmão, tan nia papel nuudar Xefe Ekipa Negosiasaun Timor-Leste nian, ema ne’ebé halo buat lubuk di’ak barak ona ho sura hosi susesu ne’ebé nia hetan no enkuantu líder Rezisténsia Nasionál ne’ebé liuhosi ‘’ konverjénsia ideia, prioridade, sentidu emisaun no, ida bootliu maka, asaun ne’ebé konsentradu hamutuk no estratéjiku, hodi tisi-hamutuk iha konseitu Unidade Nasionál no, ikusmai lori mai ita liberdade; liberdade ba povu Timor’’.
Eventu ne’e sura ho intervensaun hosi Profesór Katedrátiku Heitor Barras Romana no Manuel Meirinho Martins, Prezidente no Prezidente Konsellu Sientífiku hosi Institutu Superiór Siénsia Sosiál Universidade Lisboa nian, José Ramos-Horta, Eis-Prezidente Repúblika, Aurélio Guterres, Eis-Ministru Negósiu Estranjeiru no Kooperasaun, Avelino Coelho, Eis-sekretáriu Estadu hosi Konsellu Ministru, Francisco Miguel Martins, Reitór Universidade Nasionál Timor-Lorosa’e (UNTL) no Donaciano Costa Gomes, Diretor IDN.
Iha tersa-feira, loron-5 fulan marsu, sei hala’o serimónia abertura ba anu letivu 2019/2020 no enseramentu ba kursu hosi anu letivu 2018/2019 nian, ne’ebé sei iha intervensaun hosi Ministru defeza no Ministru Interior ein ejersísiu Filomeno da Paixão de Jesus.