Ohin, loron 22 fulan-dezembru, Parlamentu Nasionál aprova ona Orsamentu Jerál Estadu (OJE) ba tinan 2019, ho votu afavór 40, kontra 25 no laiha abstensaun.
Durante diskusaun iha jeneralidade no iha espesialidade iha loron sanulu-resin-tolu nia laran, deputadu sira analiza proposta oin-oin husi Governu no proposta alterasaun nian hamutuk 134 ne’ebé Partidu sira ho asentu Parlamentár propoin.
Primeiru-Ministru, Taur Matan Ruak, iha ninia intervensaun iha debate ne’e nia rohan, hatete katak OJE ba tinan 2019, ho valór dolar amerikanu millaun 2 132, nu’udar “orsamentu ida ba mudansa, tanba papél ne’ebé ativu liután husi Estadu no País iha dezenvolvimentu ba ita-nia rekursu naturál sira”, ne’ebé sei permite “fila-fali ba normalidade loloos, ho kontinuidade ba investimentu sira iha infraestrutura no servisu báziku sira kona-ba edukasaun, saúde, hela-fatin, konektividade, asesu ba eletrisidade, bee ka saneamentu, investimentu esensiál sira atu rekupera nivel kreximentu ne’ebé rejista to’o tinan 2016” no “insentiva investimentu privadu ho implementasaun projetu boot sira liuhusi parseria públiku-privada sira”.
Taur Matan Ruak agradese ba deputadu sira, “ba espíritu abnegasaun no sakrifísiu nian, bainhira simu dezafiu atu husik hela parte husi períodu normál pauza nian ba resesu parlamentu nian iha festa natál nian, ikusliu hodi hatan ba promesa ne’ebé halo ba Povu no ba País, hodi aprova iha tempu adekuadu ba Orsamentu Jerál Estadu tinan 2019 nian ne’ebé ita hakarak tebes atu hala’o funsionamentu Estadu  nian no ba impulsionamentu di’ak ba ita-nia ekonomia iha tinan oinmai.” 
Atu lee diskursu Primeiru-Ministru nian, iha aprezentasaun ba OJE, klike iha ne’e.
Atu lee diskursu Primeiru-Ministru nian, iha enserramentu aprezentasaun ba OJE, klike iha ne’e.