Governu Timor-Leste

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian iha loron 5 fulan-Dezembru tinan 2018

Konsellu Ministru reuni iha Palásiu Governu, iha Díli no analiza aprezentasaun hosi Sekretaria Estadu Komunikasaun Sosial kona-ba akordu ho Repúblika Popular China atu halo implementasaun ba Televizaun Dijitál Terrestre (TDT). Ho projetu ida-ne’e sei hahú harii estasaun emissora TDT rua iha Dili no área sira seluk, tuir padraun hosi ajénsia ONU ne’ebé espesializada iha teknolójia informasaun no komunikasaun, maka Uniaun Internasionál Telekomunikasaun. Konsellu Ministru mós aprova hodi atribui poder tomak ba Sekretáriu Estadu Komunikasaun Sosial, Mericio Juvenal dos Reis ‘Akara’, hodi halo asinatura ba akordu ne’e.

Diresaun Komité Orientadór 25 (CO25), aprezenta tiha ba Konsellu Ministru kona-ba balansu hosi atividade sira ne’ebé realiza ona no oinsá haree ba servisu ne’ebe sei hala’o iha tinan oin mai. Komité Orientadór 25 hanesan instituisaun ne’ebé kria liuhosi Rezolusaun Governu iha tinan-2017 no kompostu hosi organizasaun juventude Rezistênsia hamututk rua-nulu resin-lima. Objetivu CO25 maka halo investigasaun ne’ebé klean kona-ba envolvimentu joven sira nian iha luta ba libertasuan nasionál no nia rezultadu ikus maka sei hakerek livru ida kona-ba istória hosi Rezistênsia Timor-Leste nian.

Konsellu Ministru analiza tiha mós aprezentasaun hosi Sekretária Estadu ba Igualdade no Inkluzaun, Maria José da Fonseca Monteiro de Jesus, kona-ba relatóriu polítika Orsamentál ne’ebé sensivel ba kestaun jéneru nian. Relatoriu ne’e aprezenta roteiru hodi integra perpestiva kona-ba igualdade jéneru iha jestaun finansas públikas, hodi kontribui atu planeamentu no alokasaun ba rekursu publiku sira asegura sidadaun hotu-hotu nia direitu hanesan iha vida politika, sósio-ekonómika no kulturál

Governu aprova tiha mós proposta Dekretu-Lei, kona ba orgánika husi Ministériu Negósiu Estranjéiru no Kooperasaun nuudar departamentu governamental responsável ba konsepsaun, ezekusaun,  koordenasaun no avaliasaun ba politika, be definida no aprova ona hosi Konsellu Ministru, ba area politika rai-liur no kooperasaun internasionál, ba funsaun sira konsuladu nian no promosaun no defeza ba interese sidadaun timoroan nian iha rai-liur.

Konsellu Ministru analiza tiha mós proposta Dekretu-Lei kona-ba kriasaun Ajénsia Nasional ba Reforma no Modernizasaun ba Administrasaun Públika, nuudar institutu publiku ne’ebe mak kaer responsabilidade halo identifikasaun, dezenvolve no halo avaliasaun ba programa, projetu no asaun sira ne’ebé ho objetivu halo reforma no moderniza administrasaun públika hodi bele prestas bens no servisu publiku ba sidadaun di’ak liután nafatin bá oin. Proposta Dekretu-Lei ida-ne’e sei lori fali mai analiza iha Konsellu Ministru iha tempo oin mai.

Konsellu Ministru mós aprova proposta Dekretu-Lei, ne’ebé Ministériu Saúde aprezenta, relativa ba segunda alterasaun ba Dekretu-Lei 14/2004 1 Setembru nian, kona-ba funsaun servisu profisionál saúde sira nian. Dekretu-lei ida ne’e buka atu hadia validade rejistu ba profisionál saúde timoroan sira, hosi atuál tinan lima ba tinan rua, no sei konsidera mós aprovasaun hosi polítika ezame kompétensia ba profisionál saúde sira hotu, nuudar garantia ida katak profisionál saúde sira kualifikadu no iha duni kualidade bainhira ezerse sira-nia funsaun.

Governu aprova tan mós Rezolusaun Governu ne’ebé Sekretáriu Estadu ba Komunikasaun Sosiál aprezenta hodi nomeia José da Costa sai nuudar Prezidente Konsellu Diretivu Tatoli, Ajénsia Notisioza Timor-Leste, IP nian ba períudu tinan-haat.

Governu aprova tiha mós Rezolusaun Governu ne’ebe Ministru Transporte no Komunikasaun, José Agustinho da Silva aprezenta hodi  nomeia Gabriel de Jesus sai nuudar Diretór Naun Ezekutivu ba Autoridade Nasionál Komunikasaun.

Ministru Ensinu Superiór, Siénsia no Kultura, Longuinhos dos Santos, aprezenta ba Konsellu Ministru proposta Rezolusaun Governu, ne’ebé Konsellu Ministru aprova  kona-ba nomeasaun ba Armindo Maia sai nuudar Prezidente Konsellu Jerál ba Institutu Politékniku Betano, ba períodu tinan-tolu nian.

Konsellu Ministru aprova tiha Rezolusaun Governu ne’ebé Ministru Defeza, Filomeno da Paixão de Jesus aprezenta ho objetivu halo aprovasaun ba minuta hosi memorandu entendimentu ho Governu Austrália atu fó-doasaun mai Timor-Leste ekipamentu kumunikasaun no formasaun ba elementu sira F-FDTL nian kona-ba oinsá uza ekipamentu hirak-ne’e. REMATA