Sorumutuk Konsellu Ministrus nian iha loron 21 fulan-setembru tinan 2018

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian iha loron 21 fulan-Setembru tinan 2018

Konsellu Ministrus hala’o sorumutuk iha Palásiu Governu, iha Dili, no aprova ona kontinuasaun husi rejime duodésimu durante fulan-setembru atubele asegura pagamentu saláriu no despeza sira seluk, tanba Orsamentu Jerál Estadu (OJE) ba tinan 2018, Prezidente Repúblika sei analiza hela hodi hein ninia promulgasaun. Medida ida-ne’e enkuadra iha ezekusaun valór sira ne’ebé maka transfere husi Fundu Mina-Rai nian iha fulan-agostu liubá, tanba ne’e maka la presiza hato’o pedidu ba Parlamentu Nasionál atu hetan autorizasaun.

Konsellu Ministrus analiza ona aprezentasaun husi Ministériu Negósius Estranjeirus no Kooperasaun kona-ba akordu atu troka nota entre Governu Repúblika Demokrátika Timor-Leste no Governu Japaun nian atu habelar kooperasaun ekonómika iha ámbitu subvensaun husi Ajénsia Kooperasaun Internasionál Japaun nian (JICA, sigla iha lian inglés) ba projetu bolsa estudu ba dezenvolvimentu rekursu umanu (Japan Development Scholarsihps - JDS). JDS ne’e maka programa kooperasaun Japaun nian ida-ne’ebé hahú iha tinan 1999, ne’ebé implementa ona iha nasaun hamutuk 15 ho objetivu atu apoia dezenvolvimentu rekursu umanu. Membru Governu sira debate kona-ba polítika implementasaun no programasaun nian no mós área prioritária sira estudu nian husi programa ne’e tuir prioridade nasionál sira.

Ministra Finansas iha ezersísiu, Sara Lobo Brites, aprezenta ba Konsellu Ministrus atubele halo apresiasaun kona-ba senáriu hirak ne’ebé posivel ba limite másimu husi orsamentu ba tinan fiskál 2019 nian. Governu deside ona katak OJE ba tinan 2019 ninia limite másimu orsamentál maka dolar amerikanu millaun rihun 1.35. Membru Governu sira diskute ona mós kona-ba kalendáriu preparasaun nian no prioridade nasionál sira ba OJE tinan 2019 nian. Dokumentu ne’e sei submete to’o loron 8 fulan-novembru oin-mai.

Konsellu Ministrus aprova ona autorizasaun ba Ministru Defeza, Filomeno da Paixão de Jesus, atu asina akordu entre Governu Repúblika Demokrátika Timor-Leste no Governu Japaun ba atividade edukasaun no formasaun nian iha área sira hanesan asisténsia téknika umanitária no operasaun asisténsia nian iha kazu katrástrofe sira.

Aprezenta ona mós ba Konsellu Ministrus relatóriu kona-ba misaun esploratória apoiu nian husi Timor-Leste ba eleisaun iha loron 18 fulan-novembru tinan 2018 oin-mai, iha Repúblika Giné-Bisau, husi Tomás do Rosário Cabral, Reprezentante Espesiál Governu Repúblika Demokrátika Timor-Leste nian ba Repúblika Giné-Bisau atu fó apoiu ba organizasaun eleisaun nian. Delegasaun Timor nian, ne’ebé lidera husi Reprezentante Espesiál ne’e, vizita ona Giné-Bisau husi loron 3 to’o 15 fulan-setembru hodi hasoru malu ho autoridade lokál sira atu haree kondisaun sira-ne’ebé eziste no identifika nesesidade sira ba organizasaun resenseamentu eleitorál no ba realizasaun eleisaun ne’ebé livre no demokrátika.

Ikusliu, Konsellu Ministrus aprova ona proposta kona-ba Dekretu Governu nian, ne’ebé aprezenta husi Ministra Edukasaun, Juventude no Desportu, Dulce de Jesus Soares, kona-ba suplementu remuneratóriu ba funsionáriu sira no ajente sira husi Ministériu Edukasaun, Juventude no Desportu ne’ebé hala’o serbisu iha prosesu preparasaun no implementasaun prova nasionál no ezame nasionál sira. Dekretu Governu nian ne’ebé hetan ona aprovasaun ne’e estabelese osan ho valór dolar ida sentavu limanulu ba kada oras estra husi loron-segunda to’o loron-sesta no dolar rua sentavu limanulu ba kada oras iha loron-sábadu no loron-domingu. REMATA

   Ba leten