SEKOMS iha kooperasaun ho ONG PERMATIL atu organiza akampamentu ba joven sira (Perma-Youth) tinan 2018

Ter. 11 setembru 2018, 14:50h
_ACI9702a (1)

Sekretáriu Estadu ba Komunikasaun Sosiál, Merício Juvenal dos Reis “Akara” hala’o sorumutuk ho Diretór hosi Organizasaun Naun Governamentál (ONG) Permakultura Timor-Lorosa’e (PERMATIL), Ego Lemos, atu debate kona-ba divulgasaun entre foin-sa’e sira husi Akampamentu Nasionál (Perma-Youth) V nian, ne’ebé maka sei hala’o iha Postu Administrativu Maubisi, Munisípiu Ainaru, iha fulan-novembru tinan ida ne’e. Sorumutuk ne’e hala’o iha loron 11 fulan-setembru tinan 2018, iha Palásiu Governu, Dili.

Merício “Akara” hatudu ninia haksolok ba inisiativa di’ak husi PERMATIL atu organiza akampamentu ne’e, ne’ebé sei halibur foin-sa’e hamutuk liu rihun ida, la’ós de’it husi Timor-Leste, maibé mós husi nasaun sira seluk, hanesan Austrália, Indonézia no Arjentina. Sekretáriu Estadu ne’e hateten katak SEKOMS sei kolabora ho PERMATIL iha divulgasaun husi eventu ne’e no sei aproveita biban ne’e atu halo sosializasaun ba foin-sa’e sira kona-ba oinsá uza internet, liuliu rede sosiál, ho forma étika no pozitiva, ba fim sira ne’ebé produtivu no edukativu.

Molok ida-ne’e, realiza ona akampamentu nasionál haat, ne’ebé partisipa reprezentante foin-sa’e sira-nian husi munisípiu hotu: ba dahuluk iha tinan 2008, iha Tasi-Tolu, Dili; ba daruak iha tinan 2011, iha Remexiu, Aileu; ba datoluk iha tinan 2012, iha Laga, Baukau; no ba dahaat iha tinan 2015, iha Laulara, Aileu.

Diretor PERMATIL nian, Ego Lemos, hatete katak PERMATIL hakarak atu koopera ho SEKOMS atu hadi’a kona-ba fó-sai informasaun, liuliu ba foin-sa’e sira, tanba ita-nia nasaun ne’e populasaun barak liu ho otas 35 mai kra’ik, karik foin-sa’e sira ne’e ita la-prepara didi’ak sira, maka sira sei husik sira-nia aldeia no suku hodi sai ba iha sidade ka ba rai li’ur. Egos Lemos akresenta tan katak (Perma-Youth) tinan 2018 sei iha atividade ne’ebé liga ba agrikultura, turizmu, arte no kriatividade._ACI9674a (1)

Diretór Permatil ne’e hatutan mós katak akampamentu ida-ne’e, ne’ebé maka sei realiza entre loron 25 fulan-novembru no loron 1 fulan-dezembru, hakarak mós selebra Loron Nasionál Juventude no Loron Proklamasaun Independénsia Timor-Leste nian.

   Ba leten