Promosaun Igualdade Jéneru liuhusi Meiu Komunikasaun Sosiál

Kin. 06 setembru 2018, 11:45h
40920991_1154251354724253_2085370608354328576_n

Sekretáriu Estadu ba Komunikasaun Sosiál (SECOMS), Merício Juvenal dos Reis “Akara”, hala’o sorumutuk ida ho reprezentante sira husi kampaña “100% Hau Prontu” ne’ebé halibur organizasaun oin-oin ne’ebé defende direitu Feto sira nian, hanesan Fundação Pátria, Rede Feto, Caucus no Ba Futuru. Sorumutuk ne’e hala’o iha loron 6 fulan-setembru tinan 2018, iha Palásiu Governu, iha Dili.

Kampaña “100% Hau Prontu” ne’e kria iha tinan 2014 husi Fundasaun Pátria no la-kle’ur de’it akumula ona partisipasaun ida ne’ebé boot husi reprezentante oin-oin husi sosiedade sivíl nasionál no internasionál. Kampaña “100% Hau Prontu” ne’e ninia objetivu maka insentiva no prepara feto sira atu tuur iha kargu xefia nian, liu-liu ho intensaun atu hasa’e númeru kandidatu feto nian iha eleisaun munisipál no suku.

Sekretáriu Estadu ba Komunikasaun Sosiál hatete katak “sorumutuk ida-ne’e serve atu diskute forma sira husi kolaborasaun konjunta sira atu promove sira ninia hanoin inspiradora sira liuhusi meiu komunikasaun sosiál sira no forma sira husi sensibilizasaun jornalista sira ba kestaun igualdade jéneru”.

Merício Juvenal dos Reis “Akara” hatutan mós katak nia sei “konvida Rede Feto hodi halo parte ba ekipa formadór nian iha formasaun ba jornalista sira, ne’ebé maka Sekretaria Estadu Komunikasaun Sosiál promove, tanba SEKOMS ninia prioridade ida mós maka fó aten-barani ba feto sira atu partisipa iha instituisaun sira iha área komunikasaun sosiál nian no halo parte iha konsellu editoriál sira, atu nune’e bele haree ekilíbriu husi konteúdu notísia nian kona-ba kestaun sira ne’ebé liga ba igualdade jéneru”.

Laura Menezes Lopes, Diretora Fundação Pátria no koordenadora kampaña “100% Hau Prontu” hatete katak “sorumutuk ho Sekretáriu Estadu ba Komunikasaun Sosiál ne’e ninia objetivu prinsipál maka debate kona-ba forma kolaborasaun nian atu sensibiliza jornalista sira hodi hakle’an sira-nia koñesimentu kona-ba igualdade jéneru no kona-ba partisipasaun feto sira nian iha dezenvolvimentu nasionál”.

Diretora Fundasaun Pátria nian ne’e hatutan mós katak “kooperasaun ne’ebé agora hahú ho SEKOMS ne’e buka atu hetan envolvimentu másimu liután husi meiu komunikasaun sosiál nian iha Konferénsia Munisipál ba Feto Timor-Leste nian”, ne’ebé Rede Feto organiza.

Laura Menezes Lopes ko’alia mós katak “ita presiza teb-tebes partisipasaun husi meiu komunikasaun sosiál nian atu fó-sai vizaun ba dezenvolvimentu nasionál husi feto sira husi munisípiu, suku no aldeia sira”.

   Ba leten