Ministériu Finansas hasoru malu ho Komisaun Espesializada Permanente sira atu halo apresiasaun inisiál ba OJE tinan 2018
Ministra Finansas iha Ezersísiu, Sara Lobo Brites, hala’o sorumutuk ohin, loron 17 fulan-agostu tinan 2018, iha plenáriu ho Komisaun Espesializada Permanente sira, iha sorumutuk ida ne’ebé prezide husi Komisaun C – Komisaun ba Ekonomia, Finansas no Anti-Korrupsaun – iha ámbitu audiénsia públika sira ne’ebé promove husi Komisaun Parlamentár sira atu halo análize ba Proposta kona-ba Lei Orsamentu Jerál Estadu nian (OJE) ba tinan 2018.
Akompaña Ministra Finansas iha Ezersísiu, iha audiénsia públika ho komisaun sira, mak ekipa téknika Diresaun jerál Finansas Estadu nian no Koordenadora Komisaun ba Reforma Fiskál, Fernanda Borges.
Sara Lobo Brites aprezenta ona ba deputadu sira informasaun detalladu sira kona-ba OJE ba períodu husi loron 1 fulan-janeiru to’o loron 31 fulan-dezembru tinan 2018, ho valór hamutuk dolar amerikanu millaun 1.279,6, ne’ebé tau hamutuk hotu reseita no despeza sira Estadu no Seguransa Sosiál Timor-Leste nian.
Ministra Finansas iha Ezersísiu hatán ona ba pedidu esklaresimentu husi deputadu sira no hatete katak prioridade sira Governu nian ba OJE tinan 2018 ne’e maka asegura funsionamentu mákina Estadu nian, pagamentu saláriu no vensimentu, no obrigasaun sira Estadu nian ne’ebé labele rezolve iha rejime duodesimál.
Orsamentu Jerál Estadu nian ba tinan 2018 aprezenta redusaun hamutuk 9,5% kompara ho valór OJE tinan 2017 nian no sei permite atu estabelese fila-fali normalidade iha ezekusaun orsamentál, no permite atu bele hatán ba nesesidade prioritária sira, hodi ajuda hadi’a kreximentu ekonomia, ne’ebé kria kondisaun sira ba instalasaun Governu VIII no lansamentu baze sira ba ezekusaun programa governasaun nian.
Fernanda Borges aprezenta ona atividade sira Komisaun ba Reforma Fiskál nian no destaka ona kompromisu ne’ebé hakerek iha programa Governu nian kona-ba diversifikasaun ekonomia, reforsu ba setór produtivu sira ne’ebé haree ba kreximentu eknómiku, redusaun despeza no aumentu reseita sira, atu nune’e bele sees ona husi dependénsia ba fundu mina-rai no uza osan ida-ne’e ba dezenvolvimentu país nian. Ba ida-ne’e, programa reforma fiskál sai fundamentál, atu nune’e bele kria administrasaun tributária no aduaneira ida ne’ebé simples, moderna no efikás ne’ebé sei permite Governu atu kria fonte alternativa sira ba reseita interna hodi selu kustu ba funsionamentu governu no país nian.
Iha loron 22 fulan-agostu Komisaun sira sei entrega sira-nia relatóriu no paresér sira ba Komisaun C, ne’ebé sei prepara relatóriu finál atu debate iha plenáriu.
