Governu hala’o sorumutuk ho Komisaun Espesializada Permanente sira Parlamentu Nasionál nian
Ohin dader, loron 15 fulan-agostu tinan 2018, hahú ona siklu audiénsia públika nian ida ne’ebé promove husi Komisaun Espesializada Permanente sira Parlamentu Nasionál nian, kona-ba ezekusaun Orsamentu Jerál Estadu (OJE) tinan 2017 nian no apresiasaun inisiál ba Proposta Lei kona-ba OJE ba tinan 2018. Audiénsia públika sira-ne’e sei hala’o to’o loron 21 fulan-agostu. Durante períodu ne’e, Komisaun sira sei simu membru Governu sira, Prezidénsia Repúblika, Dirijente sira Administrasaun Públika nian no reprezentante sira sosiedade sivíl nian.
Iha audiénsia públika dahuluk nian, deputadu sira husi Komisaun A – Komisaun ba Asuntu Konstitusionál no Justisa nian – simu Ministru Estadu no Ministru Prezidénsia Konsellu Ministrus nian, Ministru Reforma Lejizlativa no Asuntus Parlamentares, Xefe Gabinete Primeiru-Ministru, Inspetór-Jerál Estadu, Diretór Sentru Nasionál Chega! no Diretór Arkivu & Muzeu Resisténsia Timorense, atu halo debate no fó klarifikasaun kona-ba orsamentu sira ba tinan finanseiru 2018 nian.
Iha loron 22 fulan-agostu komisaun sira sei entrega relatóriu no paresér setoriál ba Komisaun C (Komisaun ba Ekonomia, Finansas no Anti-Korrupsaun), ne’ebé trata kona-ba asuntu Finansas Públikas nian, hodi prepara relatóriu no paresér atu entrega iha Sesaun Plenária ba diskusaun kona-ba Proposta Lei kona-ba OJE ba tinan 2018.
Proposta kona-ba OJE ne’e entrega ona iha loron 7 fulan-agostu tinan 2018 ba Parlamentu Nasionál husi Ministru Reforma Lejizlativa no Asuntus Parlamentares, Fidélis Manuel Leite Magalhães, ne’ebé mak akompaña husi Vise-Ministra Finansas, Sara Lobo Brites.
