Governu entrega Proposta Orsamentu Jerál Estadu 2018 ba Parlamentu Nasional

Kua. 08 agostu 2018, 10:55h
38635905_971170229753169_2105530922848747520_n

Governu entrega ona Proposta Lei kona-ba Orsamentu Jerál Estadu tinan 2018 nian, iha loron 7 fulan-agostu tinan 2018, ba Prezidente Parlamentu Nasionál, Arão Noé Amaral. Orsamentu ne’ebé entrega ba Parlamentu Nasionál ne’e hamutuk ho (engloba) reseita no despeza sira Estadu nian no Seguransa Sosiál Timor-Leste no kobre períodu husi loron 1 fulan-janeiru to’o loron 31 fulan-dezembru tinan 2018.

Proposta Lei kona-ba Orsamentu Jerál Estadu tinan 2018 nian hetan aprovasaun iha Konsellu Ministrus iha loron 2 fulan-agostu tinan 2018 no entrega ona ba Prezidente Parlamentu Nasionál husi Ministru Reforma Lejislativa no Asuntu Parlamentár, Fidelis Leite Magalhães, no husi Vise-Ministra Finansas, Sara Lobo Brites.

Sara Lobo Brites hatete katak “Proposta kona-ba Orsamentu ne’ebé foin entrega ne’e ninia prioridade mak atu fó kontinuidade ba programa ne’ebé define ona iha Planu Estratéjiku Dezenvolvimentu Nasionál (PEDN), ne’ebé hahú iha tinan 2017, no orsamentu ne’e inklui kompromisu polítiku sira Governu nian hanesan pagamentu ba pensaun ferik-katuas nian no obrigasaun sira husi Estadu ne’ebé labele rezolve iha rejime duodesimál”.

Fidelis Leite Magalhães hatutan katak Proposta Orsamentu ne’ebé entrega ona atu hetan apreiasaun husi Parlamentu Nasionál ho “valór hamutuk billaun 1.2 engloba tinan 2018 no la’ós de’it fulan haat liubá ne’e, maibé ba períodu fulan-setembru to’o fulan-dezembru, proposta ne’e inklui besik millaun 700”. Ministru Reforma Lejizlativa no Asuntu Parlamentár afirma mós katak prioridade sira Orsamentu nian ne’ebé entrega ona ba Parlamentu Nasionál maka “atu asegura funsionamentu mákina Estadu nian, pagamentu ba saláriu no vensimentu sira, no pagamentu apoiu nian ba benefísiu sira husi programa Bolsa Inan nian [Bolsa da Mãe] no pensaun ba katuas-ferik sira.

Proposta Lei kona-ba Orsamentu Jerál Estadu nian ba tinan 2018 sei entrega ohin, loron 8 fulan-agostu, husi Prezidente Parlamentu Nasionál ba Komisaun C atu nune’e hahú prosesu diskusaun molok aprezenta iha Plenáriu.

   Ba leten