Governu aprova Proposta Lei Orsamentu Jerál Estadu nian ba tinan 2018

Kin. 02 agostu 2018, 23:25h
reuniao_CdM

Konsellu Ministrus hala’o sorumutuk iha Palásiu Govenu, iha Dili, no aprova Proposta Lei ne’ebé aprova ona Orsamentu Jerál Estadu nian (OJE) ba tinan 2018, ne’ebé Ministra Finansas iha ezersísiu, Sara Lobo Brites, aprezenta. Orsamentu ne’e ninia valór maka millaun 1.279,6 dolar amerikanu no inklui reseita no despeza hotu-hotu Estadu no Seguransa Sosiál Timor-Leste ninian, durante períodu husi loron 1 fulan-janeiru to’o loron 31 fulan-dezembru tinan 2018. OJE ba tinan 2018 haree tuir ba nesesidade Programa Governu foun nian, ne’ebé aprova iha Parlamentu, iha semana kotuk, Estrutura Orgánika foun Governu Konstitusionál VIII nian no dezempeñu ezekusaun orsamentál iha rejime duodesimál. Kompara ho Orsamentu Estadu tinan 2017 nian, orsamentu ne’e iha redusaun 9,5%. Aprovasaun ba proposta orsamentu nian ida-ne’e importante tebtebes, hodi estabelese filafali normalidade iha ezekusaun orsamentál, no permite atu atende nesesidade hirak ne’ebé sai hanesan prioridade atu oinsá bele hetan fila-fali kreximentu ekonomia nian, hodi prepara kondisaun ba instalasaun Governu VIII nian no ba lansamentu baze sira ba ezekusaun programa governasaun nian.

   Ba leten