Ministru Defeza simu pose

Prezidente Repúblika, Francisco Guterres Lú Olo, fó pose ba Filomeno Paixão hanesan Ministru Defeza Governu Konstitusionál VIII nian, iha serimónia ida ne’ebé hala’o iha loron 9 fulan-jullu, iha Palásiu Prezidente Nicolau Lobato, iha Dili.

Iha nia diskursu Primeiru-Ministru temi liu ba “onestidade, esperiénsia no kompeténsia”  Filomeno Paixão nian no rekoñese “méritu iha servisu sira ne’ebé fó ona ba Nasaun durante luta ba libertasaun nasionál no durante besik tinan ruanulu ba konstrusaun Forsa Defeza nian sira balu, ne’ebé modernu, profisionál no efisiente, bele hatán ba dezafiu lubun ida husi defeza interna no esterna nian husi mundu atuál”.

Taur Matan Ruak afirma mós katak “fiar katak ho nomeasaun ida-ne’e bele reforsa kompromisu Timor-Leste nian kona-ba kontribuisaun ba estabilidade, prosperidade, seguransa no armonia Nasaun nian, kondisaun fundamentál sira ba adezaun ba ASEAN no ba konsolidasaun Estadu Direitu Demokrátiku nian”.

url: http://timor-leste.gov.tl?lang=tp&p=19969