Governu Konstitusionál VIII simu pose

Ses. 22 juñu 2018, 14:57h
VIII_Governo

Prezidente Repúblika, Francisco Guterres Lú Olo, fó ona pose ba Governu Konstitusionál VIII, ne’ebé lidera husi Primeiru-Ministru Taur Matan Ruak, iha serimónia ida ne’ebé hala’o iha loron 22 fulan-juñu tinan 2018, iha Salaun Nobre Palásiu Prezidensiál Lahane nian, iha Dili.

Hafoin membru Governu sira simu pose, Primeiru-Ministru Taur Matan Ruak, hateten iha ninia diskursu katak Governu Konstitusionál VIII hahú ninia misaun “iha momentu ida ne’ebé desizivu ba dezenvolvimentu, modernidade no progresu husi ita-nia Demokrásia joven ne’e, atu kumpre objetivu boot sira husi dezenvolvimentu sustentavel no planu boot ida atu transforma “Timor-Leste sai País ida ne’ebé Riku, Forte no Seguru!”.

Primeiru-Ministru afirma katak Governu fiar “iha nia projetu mobilizadór no iha orientasaun husi ninia vizaun estratéjika, ne’ebé espresa loloos iha kualidade, integridade no empeñu husi estrutura Governu nian ne’ebé ohin simu pose” no ne’ebé “hakarak atu sai hanesan motór mudansa no transformasaun sosiedade ida-ne’e nian”.

Taur Matan garante mós katak “dezenvolvimentu kapitál umanu, kriasaun infraestrutura bázika, diversifikasaun no espansaun setór sira ekonomia nian, no konsolidasaun prátika di’ak sira kona-ba jestaun, transparénsia no prestasaun konta”, maka área sira ne’ebé konsidera fundamentál ba Governu Konstitusionál VIII.

Prezidente Repúblika, iha ninia intervensaun, garante “kolaborasaun institusionál ne’ebé presiza ho Governu no órgaun soberania sira seluk, iha promosaun valór no prátika sira kona-ba governasaun di’ak, ne’ebé kontribui ba susesu husi dezenvolvimentu sosiál no ekonómiku nasionál”.

Francisco Guterres Lú Olo felisita mós “eleitór sira no sosiedade tomak ne’ebé liuhusi sira-nia votu permite reforsu ba demokrasia, pás no estabilidade, hodi habelar Timor-Leste nia naran iha rejiaun ne’e, ASEAN no mundu tomak”.

Iha serimónia simu pose nian ne’e marka prezensa mós individualidade sira Timor-Leste nian no husi komunidade internasionál, reprezentante sira husi korpu diplomátiku no organizasaun la’ós-governamentál no distintu konvidadu sira seluk.

Atu haree diskursu Primeiru-Ministru klike iha ne'e

Atu haree komposisaun Governu Konstitusionál VIII klike iha ne'e

   Ba leten