Sorumutuk Estraordinária Konsellu Ministrus nian iha loron 10 fulan-maiu tinan 2018

Prezidénsia Konsellu Ministrus

VII Governu Konstitusionál

……………………………………………………………………………………………………………

Komunikadu Imprensa

Sorumutuk Estraordinária Konsellu Ministrus nian iha loron 10 fulan-maiu tinan 2018

Governu hala’o sorumutuk iha Pálasiu Governu, iha Dili, no Primeiru-Ministru, Marí Alkatiri, no Prezidente Konferénsia Episkopál Timorense (KET, sigla iha lian tetun), Bispu Don Basílio do Nascimento, asina ona akordu ida ne’ebé define atribuisaun, husi parte Governu nian ba KET, husi subvensaun (subsídiu) anuál ida ho valór hamutuk dolar amerikanu millaun rihun sanulu-resin-lima ba tinan finanseiru 2018 nian, ba atividade sira iha área sosiál, edukativa no governu ekleziál nian. Akordu ne’e hanesan rezultadu husi Akordu-Kuadru ne’ebé asina iha loron 16 fulan-juñu tinan 2017, ne’ebé mai atu define regra sira parseria nian ba selebrasaun akordu anuál sira subvensaun nian ba transferénsia osan (verba) sira husi Orsamentu Jerál Estadu nian ba Konferénsia Episkopál Timorense, tuir Akordu entre Santa Sé no Respúblika Demokrátika Timor-Leste. Akordu ne’ebé asina daudaun ne’e prevee nu’udar parte dahuluk ho valór hamutuk dolar amerikanu millaun lima atubele transfere ona iha loron 1 fulan-juñu tinan 2018, no parte daruak nian ho valór restante hamutuk dolar amerikanu millaun sanulu atubele transfere kedas bainhira Lei kona-ba Orsamentu Jerál Estadu nian ba tinan 2018 tama ona iha vigór.

Konsellu Ministrus aprova ona proposta kona-ba Dekretu Governu nian, ne’ebé aprezenta husi Ministru Planu no Finansas, Rui Augostu Gomes, kona-ba pagamentu suplementár estraordináriu ba funsionáriu sira husi Ministériu Administrasaun Estatál no Ministériu Planu no Finansas ne’ebé serbisu durante prosesu eleisaun parlamentár, hodi rekoñese dedikasaun profisionál no kumprimentu ezemplár ba sira-nia knaar iha preparasaun ba eleisaun antesipada tinan 2018 ne’ebé obriga funsionáriu sira aumenta númeru oras suplementár serbisu nian ás ne’ebé lahó remunerasaun.

Governu aprova ona deliberasaun Konsellu Ministrus nian, ne’ebé aprezenta husi Ministru Defeza no Seguransa, Agostinho Sequeira Somotxo, kona-ba promosaun Ofisiál Superiór na’in-haat FALINTIL-Forsa Defeza Timor-Leste nian (F-FDTL) ba Ofisiál Jenerál, ne’ebé kumpri rekezitu sira promosaun nian tuir distinsaun ne’ebé estabelese iha Estatutu Militár F-FDTL nian ne’ebé vigora hela.

Ikusliu, Primeiru-Ministru, Marí Alkatiri, aprezenta proposta Rezolusaun Governu nian, ne’ebé aprova husi Konsellu Ministrus, ne’ebé nomeia Florêncio da Conceição Sanches hanesan Diretór Ezekutivu Servisu Rejistu no Verifikasaun Emprezariál, Institutu Públiku (SERVE I.P.). Institutu ne’e mak úniku servisu públiku ne’ebé responsavel ba rejistu Sosiedade Komersiál no Emprezáriu nian iha Naran Individuál (ENIN, sigla iha lian portugés), nune’e mós atu verifika sira-nia situasaun jurídika, ho kompeténsia atu apresia admisibilidade firma sira nian, no atu organiza no jere baze dadus rejistu komersiál nian. Diretór Ezekutivu foun ne’e sei nomeia ba periódu tinan 3 tuituir malu, no bele nomeia filafali ba periódu ne’ebé hanesan. REMATA

url: http://timor-leste.gov.tl?lang=tp&p=19836