Ministra Justisa hala’o sorumutuk ho Ministru Estadu Koordenadór Asuntu Sosiál, Justisa no Fortalesimentu Índia nian

Iha loron-segunda, loron sia fulan-abríl tinan 2018, Ministra Justisa, Maria  Ângela Carrascalão, hala’o sorumutuk bilaterál ida ho ninia omólogu, Ministru Estadu Koordenador Asuntu Sosiál, Justisa no Fortalesimentu Índia nian, Krishan Pal Gurjar, akompaña husi Diretora-Jerál Ministériu Justisa nian, Marcelina Tilman da Silva, Diretór husi Diresaun Nasionál Asesoria Jurídika no Lejislasaun nian (DNAJL – sigla iha lian portugés), Nelinho Vital, Xefe Gabinete Ministra Justisa, Lourenço Tavares Ferreira. Serimónia ne’e hala’o iha Salaun Institutu Estudu Diplomátiku nian iha Ministériu Negósius Estranjeirus, iha Dili.

Partisipante sira iha sorumutuk ne’e halo debate besik oras ida nia laran kona-ba situasaun atuál iha país rua ne’e, relasiona ba setór infraestrutura sira husi agrikultura, peskas, saúde no edukasaun nian.

Iha sorumutuk ne’e, Krishan Pal Gurjar, hatudu ninia vontade apoiu nian ba Timor-Leste iha área defeza no seguransa marítima.

Eventu ne’e remata ho almosu hamutuk ida no troka prezente sira entre Ministra Justisa no Ministru Estadu Koordenadór Asuntu Sosiál, Justisa no Fortalesimentu Índia nian, hanesan sinál ida atu hametin liután relasaun entre Timor-Leste no Índia.

url: http://timor-leste.gov.tl?lang=tp&p=19771