Sorumutuk Konsellu Ministrus nian iha loron 4 fulan-abril tinan 2018

Prezidénsia Konsellu Ministrus

VII Governu Konstitusionál

………………………………………………………………………………………………………………

Komunikadu Imprensa

Sorumutuk Konsellu Ministrus nian iha loron 4 fulan-abril tinan 2018

Governu hala’o sorumutuk iha Palásiu Governu, iha Dili, no aprova ona proposta kona-ba Dekretu-Lei ne’ebé estabelese rejistu nasionál kona-ba rό sira Timor-Leste nian, ne’ebé aprezenta husi Vise-Ministru Dezenvolvimentu ba Transportes no Komunikasoins, Inácio Moreira. Dekretu-Lei ida-ne’e hatuur norma hirak ne’ebé presiza atu halo rejistu kona-ba rό sira timor nian, hodi fό ba ró sira ne’e direitu ida atu hasa’e bandeira Timor-Leste, tuir lejizlasaun nasionál ne’ebé vigora no konvensaun internasionál sira kona-ba Direitu Tasi nian ne’ebé Timor-Leste ratifika ona, hodi garante seguransa no rekizitu tékniku sira ne’ebé presiza atu ró sira ne’e bele la’o iha tasi-laran.

Vise-Ministru Dezenvolvimentu ba Transportes no Komunikasoins aprezenta mόs proposta kona-ba Dekretu-Lei, ne’ebé Governu aprova ona, kona-ba organizasaun servisu inspesaun nian ba rό sira ho objetivu atu kria mekanizmu sira kona-ba prevensaun asidente no dezastre sira iha tasi laran, hodi promove seguransa husi sidadaun sira ne’ebé mak uza transporte tasi nian, sasán sira tula iha ró, ambiente tasi nian no kualidade servisu ne’ebé halo, tuir regra no padraun internasionál sira ne’ebé estabelese tiha ona.

Konsellu Ministrus aprova ona proposta kona-ba Rezolusaun Governu nian, ne’ebé aprezenta husi Ministru Planu no Finansas, Rui Augusto Gomes, kona-ba subsídiu ba kandidatu sira Eleisaun Prezidensiál nian iha tinan 2017, hodi define katak subvensaun ne’e sei hala’o diretamente husi Ministériu Planu no Finansas.

Ikusliu, Grupu SACOM ENERGIA, holding Timorense, aprezenta ona ba Konsellu Ministrus, ninia projetu iha Hera, kompostu husi parte rua, portu ida ho medida 600m atubele hatún sasán husi rό ho kapasidade médiu, no terminál ida atu tau kombustivel, ho objetivu atu hasa’e kapasidade enerjia país ne’e nian. Projetu ida ne’e, ne’ebé ninia investimentu tomak maihusi privadu, ninia valόr totál maka maizoumenus dolar amerikanu millaun sanulu resin rua. REMATA

url: http://timor-leste.gov.tl?lang=tp&p=19754