Governu Timor-Leste

Ministra Justisa fó ona pose ba guarda prizionál na’in 34 ba prizaun Suai nian, iha loron 26 fulan-marsu tinan 2018, iha auditóriu Ministériu Justisa nian, iha serimónia ida ne’ebé prezide husi Ministra Justisa, Maria Ângela Carrascalão, ne’ebé akompaña husi Vise-Ministru Justisa, Sebastião Dias Ximenes, Diretór-Jerál Ministériu Justisa nian, Marcelina Tilman da Silva no husi Prezidente Komisaun Funsaun Públika, Faustino Cardoso.

Ministra Justisa hateten, iha ninia intervensaun katak “hafoin halo tiha selesaun rigoroza ida, tuir Estatutu Funsaun Públika nian, hili ona guarda prizionál na’in 34 entre kandidatu hamutuk 2931”, no ko’alia liután katak feto na’in haat ne’ebé liu iha rekrutamentu ne’e “hatudu kapasidade no responsabilidade ne’ebé boot”.

Maria Ângela Carrascalão fó parabéns ba guarda prizionál sira ne’ebé maka foin simu pose ne’e no apela ba sira “atu defende Estadu Direitu, atu hala’o knaar bazeia ba Konstituisaun RDTL nian, hodi kumpre ho dignidade no lealdade tuir Estatutu Funsaun Públika”, no informa tan katak iha tempu badak sei halo vizita ba instalasaun prizaun Suai nian.

Ikus liu, Prezidente Komisaun Funsaun Públika, Faustino Cardoso, fó parabéns ba guarda prizionál foun sira “ba esforsu ne’ebé sira halo ona durante prosesu rekrutamentu ne’ebé hahú iha fulan-marsu tinan 2017”, no ko’alia liután kona-ba “importánsia husi serimónia ida-ne’e ba emposadu foun sira-nia moris tanba prosesu selesaun nian ne’e difísil tebes, iha ne’ebé eskolla pursentu ida de’it husi partisipante sira liuhusi konkursu klásiku ida entre kandidatu na’in 2931”.