Sorumutuk Konsellu Ministrus nian iha loron 28 fulan-marsu tinan 2018

Prezidénsia Konsellu Ministrus

VII Governu Konstitusionál

………………………………………………………………………………………………………………

Komunikadu Imprensa

Sorumutuk Konsellu Ministrus nian iha loron 28 fulan-marsu tinan 2018

Governu hala’o sorumutuk iha Palásiu Governu, iha Dili, no aprova ona proposta ba Dekretu-Lei kona-ba estatutu kompañia Murak-Rai Timor, S.A., nian ne’ebé aprezenta husi Ministru Estadu no Ministru Rekursus Minerais, Mariano Assanami Sabino. Murak-Rai Timor, ho kapitál sosiál tomak maihusi Estadu, ninia objetu mak atu hala’o atividade mineira sira, ne’ebé inklui atividade rekoñesimentu, peskiza, avaliasaun, dezenvolvimentu, esplorasaun no tratamentu, prosesamentu, refinasaun no komersializasaun rekursu minerál sira. Empreza ne’e sei fó dalan ba Estadu hodi halo operasaun iha setór mineiru, iha rai-laran no iha rai-li’ur, iha kondisaun ne’ebé hanesan ho empreza privada sira seluk husi setór ne’e, no garante dezenvolvimentu husi setór rekursu minerál sira nian, fonte prinsipál ida mós husi rendimentu nasionál, no mós aumentu husi kapasidade atu fó serbisu ba sidadaun nasionál sira.

Vise-Ministru Dezenvolvimentu ba Transportes no Komunikasoins, Inácio Freitas Moreira, aprezenta ona proposta ba Dekretu-Lei kona-ba estabelesimentu norma sira iha área seguransa iha aviasaun sivíl nian, atubele proteje aviasaun sivíl hasoru aktu interferénsia ilísita ne’ebé bele fó risku ba seguransa aviasaun sivíl nian, tuir aneksu 17 husi Konvensaun Xikagu nian kona-ba Aviasaun Internasionál ne’ebé ratifika ona husi Estadu Timor iha tinan 2004, liuhusi Rezolusaun Parlamentu n.12/2004, loron 9 fulan-dezembru. Proposta lejizlativa ne’e hetan ona aprovasaun husi Konsellu Ministrus, ho adaptasaun ne’ebé prevee koordenasaun entre Autoridade Aviasaun Sivíl no entidade responsavel ba jestaun aeroportu Rejiaun Administrativa Espesiál Oekusi Ambenu (RAEOA) nian. REMATA

url: http://timor-leste.gov.tl?lang=tp&p=19707