Aniversáriu da-18 PNTL – Polísia Nasionál Timor-Leste ninian

Polísia Nasionál Timor-Leste (PNTL) selebra ninia aniversáriu da-18, iha loron 27 fulan-marsu, iha Sentru Formasaun Polísia, iha Komoro, Dili.

Iha loron ida molok, loron 26 fulan-marsu dadeer, hala’o misa Agradesimentu, iha kapela Santu António, iha Sentru Formasaun Polísia no fó omenajen ida iha monumentu ba martir sira PNTL nian.

Iha loron 27, durante serimónia selebrasaun aniversáriu PNTL nian ne’e, fó-sai promosaun no fó sertifikadu louvór nian no kondekorasaun ba komandante no membru PNTL nian sira, ba Xefe Estadu-Maiór Forsa Armada nian, Majór Jenerál Lere Anan Timur no Badan Narkotik husi Indonézia, ne’ebé entrega husi Prezidente Repúblika, Francisco Guterres Lú Olo, Prezidente Parlamentu Nasionál, Aniceto Guterres, Primeiru-Ministru, Marí Alkatiri, Ministru Defeza no Seguransa, Agostinho Sequeira Somotxo, Komandante Jerál PNTL, Júlio Hornay, Prezidente Tribunál Rekursu, Deolindo dos Santos, no husi Prokuradora Adjunta husi Prokuradoria Jerál Repúblika, Zelia Trindade.

Komandante-Jerál PNTL nian, Júlio Hornay, durante ninia intervensaun hato’o ninia rekoñesimentu ba “Estadu no Governu tanba esforsu no dedikasaun ba estabilidade no pás iha nasaun ne’e” no agradese ba Primeiru-Ministru no Ministru Defeza no Seguransa ba apoiu tomak ne’ebé fó ona ba PNTL to’o oras ne’e”. Julio Hornay mós ko’alia liután kona-ba progresu sira instituisaun ne’e nian to’o oras ne’e no apela ba “membru PNTL nian hotu-hotu atu serbisu ho dedikasaun  hodi asegura estabilidade no seguransa iha territóriu nasionál durante eleisaun antesipada oinmai”.

Prezidente Repúblika, Francisco Guterres Lú Olo, iha ninia diskursu, felisita membru PNTL nian sira hotu “ne’ebé loron-loron dedika sira nia an ba kauza públika, ne’ebé defende Estadu direitu demokrátiku no liberdade, hodi saran sira-nia kapasidade tomak atu serbí nasaun ne’e no timoroan hotu-hotu”. Xefe Estadu nian hateten klaru mós katak “nu’udar Konstituisaun Timor nian hateten, sidadaun sira iha direitu atu moris iha liberdade no seguransa nia laran no Estadu iha devér, liuhusi Polísia, atu defende direitu sidadaun sira nian, legalidade demokrátika no seguransa iha nasaun ne’e”. Francisco Guterres Lú Olo hateten mós katak “prosesu demokrátiku daudaun ne’e hasoru situasaun ne’ebé la’ós fasil”, maibé nia fiar katak “polísia nasionál hamutuk ho forsa defeza  nian sei garante susesu husi prosesu eleitorál ne’ebé hala’o atu hili reprezentante foun sira atu tuur iha Parlamentu Nasionál, tuir regra sira demokrasia nian no iha ambiente pás no estabilidade ne’ebé sei halo Timor-Leste sai hanesan ezemplu demokrasia nian ida ba mundu”.

Partisipa mós iha serimónia ne’e membru sira husi Governu Konstitusionál VII, reprezentante sira husi korpu diplomátiku, parseiru dezenvolvimentu no reprezentante sira husi komponente militár no polísia internasionál sira.

url: http://timor-leste.gov.tl?lang=tp&p=19698