Sorumutuk Konsellu Ministrus nian iha loron 20 fulan-marsu tinan 2018

Prezidénsia Konsellu Ministrus

VII Governu Konstitusionál

..............................................................................................................................

Komunikadu Imprensa

Sorumutuk Konsellu Ministrus nian iha loron 20 fulan-marsu tinan 2018

Governu hala’o sorumutuk iha Pálasiu Governu, iha Dili, no aprova ona proposta kona-ba Dekretu-Lei ba regulasaun organizasaun no funsionamentu husi Komisaun Terras no Propriedades, ne’ebé aprezenta husi Ministra Justisa, Maria Ângela Carrascalão. Proposta lejizlativa ne’e buka atu regula Komisaun Terras no Propriedades, ne’ebé kria liuhusi artigu da-55 no artigu hirak tuirmai husi Lei n. 13/2017, loron 5 fulan-jullu, ne’ebé aprova ona Rejime Espesiál ba Definisaun kona-ba Titularidade Beins Imóveis. Komisaun Terras no Propriedades, hanesan pesoa koletiva ho Direitu Públiku, goza autonomia administrativa, finanseira no patrimoniál, no ninia misaun mak atu apresia no rezolve kazu disputa sira iha ámbitu prosesu rekoñesimentu no atribuisaun ba direitu no propriedade.

Konsellu Ministrus analiza ona proposta kona-ba Rezolusaun Governu nian ba kriasaun komisaun interministeriál ba kampaña marketing no promosaun kona-ba destinu turístiku iha Timor-Leste,  ho lema “Visita Timor-Leste 20-30”, ne’ebé aprezenta husi Ministru Turizmu, Manuel Vong. Proposta kona-ba Rezolusaun Governu nian nian ne’e buka atu define instituisaun Estadu nian sira ne’ebé partisipa iha kampaña no apoia ba kriasaun kondisaun favoravel sira ba dezenvolvimentu estratéjia sira no metodolojia ne’ebé sei utiliza iha kampaña promosaun no marketing país nian hanesan destinu turístiku no destinu investimentu turístiku nian, ho konsiderasaun katak turizmu eleitu ona hanesan pilár prinsipál ida mós iha dezenvolvimentu ekonómiku país nian, ne’ebé ninia promosaun kompete ba Governu, setór privadu, komunidade lokál no sosiedade sivíl. Proposta ne’e la hetan aprovasaun, no iha ona akordu ida atu kria grupu traballu nian ida ne’ebé haree kona-ba revizaun ba Polítika Nasionál Turizmu nian.

Hodi konsidera katak, nu’udar efeitu husi Rezolusaun Governu n. 2/2018, loron 24 fulan-janeiru nian, Governu Timor-Leste autoriza ona Peek Everest Mining, Lda hodi halo rekolla, esportasaun no teste ba amostra manganés husi depózitu sira ne’ebé lokaliza iha área Nipane no Pasabe, iha Rejiaun Administrativa Espesiál Oekusi Ambenu no tanba iha tiha ona konfirmasaun kona-ba ezisténsia husi depózitu relevante manganés nian iha área hirak ne’e, Autoridade Nasionál Petróleu no Minerais (ANPM) aprezenta ona ba Konsellu Ministrus proposta kona-ba Rezolusaun Governu nian ne’ebé define termu no kondisaun jerál sira husi kontratu prospesaun manganés nian entre Repúblika Demokrátika Timor-Leste (RDTL no Peek Everest Mining, Lda. Ministru Estadu no Ministru Rekursus Minerais, Mariano Assanami Sabino, maka hodi RDTL nian naran no reprezenta RDTL, simu mandatu atu halo negosiasaun kona-ba termu konkretu sira no kondisaun sira husi kontratu prospesaun nian ne’e. Rezolusaun Governu nian ne’e e hetan aprovasaun ho korresaun balun. REMATA

   Ba leten